Գովեստներից գուցէ շոյվես,
Խորհուրդներից՝ կը սովորես:
 ***
Որքան էլ որ արդար լինես,
Չար խօսքերը՝ պիտ հանդուրժես:

 ***
Սխալն ընդունելը՝
ողջամտութիւն է,
Իսկ այն շտկելը՝ խելահասութիւն:
 ***
Հարուստ լինել՝ չի նշանակում ամէն ինչ ունենալ կեանքում:
 ***
Կեանքը դառնում է անիմաստ՝ առանց պայքարի:
 ***
Ստախօսութիւնը, մարդկային ամէնաչար  որակներից մէկն է:
 ***
Երախտագիտութիւնը, վեհանձն յատկանիշ է:
 ***
Խենթից էլ կարելի է՝ ինչ որ բան սովորել:
 ***
Եթէ կեանքում կամք չունենաս,
Լոկ տեղումդ կը տոփաս:
 ***
Խօսելու արժէքը լոկ համրը գիտի,
Իսկ լուսինը՝ կոյրը մարդը գիտի:
 ***
Կեանքում, վախենում են  միայն անճարակները:
 ***
Քննադատութիւնը  եւ գովասանքը,
մի բարձի են ծերանում:
 ***
Կեանքում, միայն բարեկամ ունենալ չե՛ս կարող:
 ***
Սիրի՛ր ուրիշին,
բայց ոչ ինքդ քեզ:

-----------------------------

ՄԵՐ  ՆՄԱՆՆԵՐԸ...

Մեր նմանները
Երբ հայ են ծնւում,
Կապուած են լինում իրենց արմատին,
Ինչպէս ծառերը
Գամուելով հողին,
Երբեք չեն յանձնւում՝ քամու տարերքին...

Մեր նմանները
Երբ հայ են ծնւում,
Նրանք սփռում են լոյսը մարդ-կային,
Ինչպէս արեւն է
Ոսկէ շողերով,
Ողջոյնն իր յղում՝ համայն աշխարհին...

Աւիկ Դերենց
Պոսթըն