Դաշնակցութիւնը սատարում է Ղարաբաղի գործող նախագահին
Հ. Յ. Դաշնակցութեան Արցախի կեդրոնական կոմիտէն (ԿԿ) որոշում կայացրեց Լեռնային Ղարաբաղի նախագահի առաջիկայ ընտրութիւններում սատարել գործող նախագահ Բակօ Սահակեանի թեկնածութիւնը:
Դաշնակցութեան այս յայտարարութիւնը շատերին անակնկալի բերեց. փաստօրէն, կուսակցութիւնը չսատարեց նախագահի միւս թեկնածու Վիտալի Բալասանեանին, ով 2010 թուականին պատգամաւոր է ընտրուել Դաշնակցութեան համամասնական ցուցակով եւ ներկայումս էլ Ղարաբաղի Ազգային ժողովի Դաշնակցութիւն խմբակցութեան անդամ է:
«Ազատութիւն» ռատիոկայանի հետ զրոյցում Դաշնակցութեան Արցախի կեդրոնական կոմիտէի ներկայացուցիչ Դաւիթ Իշխանեանը պարզաբանեց, թէ ինչու որոշուեց չսատարել Վիտալի Բալասանեանին. - «Այս պարագային, թերեւս, ակնյայտ էր, որ մինչեւ առաջադրումը Դաշնակցութեան ֆրակցիայի անդամը եւ Դաշնակցութեան համամասնական ընտրացուցակով առաջադրուած պատգամաւորը պէտք է յստակ ստանայ Դաշնակցութեան պատասխանատու կառոյցի յստակ որոշումը: Իսկ նման որոշումը՝ յատկապէս նախագահական ընտրութիւններին, նոյնիսկ սեփական թեկնածուի առաջադրման հարց կամ որեւէ մէկին սատարելու հարցը, բաւականին երկար քննարկումների արդիւնքում է կայացւում՝ ոչ միայն Արցախի կեդրոնական կոմիտէ, այլ նաեւ կեդրոնական կոմիտէի բիւրօ , որովհետեւ Արցախի նախագահի ընտրութիւնը համահայկական տարողունակութեան խնդիր է»:
Անդրադառնալով Դաշնակցութեան այս յայտարարութեանը՝ Վիտալի Բալասանեանը Facebook-ի իր էջում գրել է . - «Լինելով անկուսակցական, բայց խմբակցութեան անդամ՝ ես իմ բարոյական պարտքն եմ համարել նախագահական ընտրութիւններում առաջադրուելու մտադրութեան մասին տեղեկացնել խմբակցութեան ղեկավարին եւ անդամներին։ Ինքնառաջադրումից յետոյ ՀՅԴ Արցախի ԿԿ անդամների եւ ներկայացուցչի հրաւէրով հանդիպել եմ իրենց հետ, եղել են տարբեր հարցադրումներ, դրանից յետոյ ԿԿ-ն ժամանակ է խնդրել՝ ինձ պաշտպանելու հարցը օրակարգ մտցնելու եւ քննարկելու համար: Որոշ ժամանակ անց ԿԿ կողմից հրաւիրուել եմ գրասենեակ եւ ինձ տեղեակ են պահել, որ կայ կայացրած որոշում՝ չսատարել որեւիցէ թեկնածուի եւ կուսակցութեան անդամներին ազատ ընտրութեան կոչ անել»:
Ի պատասխան «Ազատութիւն» ռատիոկայանի հարցի՝ Դաւիթ Իշխանեանը հերքեց նման պայմանաւորուածութեան առկայութիւնը։ «Ես կարող եմ ինքնավստահ ասել, որ որեւէ պայմանաւորուածութիւն չէր կարող լինել եւ որեւէ պայմանաւորուածութիւն չկար», - յայտարարեց նա։
Բալասանեանը ֆէյսբուքեան իր յայտարարութեան մէջ կարծիք էր յայտնել նաեւ, որ «Դաշնակցութեան այս որոշումը չի արտացոլում Դաշնակցութեան անդամների մօտեցումները եւ ընդունուել է ԿԿ մի խումբ անդամների եւ Բիւրոյի ներկայացուցիչ Հրանտ Մարգարեանի ազդեցութեան տակ»։ «Գտնում եմ, որ ընդունուած որոշումը ոչինչ չունի Դաշնակցութեան գաղափարախօսութեան եւ դաւանած արժէքների հետ, եւ Դաշնակցութեան անդամների եւ համակիրների մեծամասնութիւնը չի կիսում այս որոշումը», - յաւելել էր նա։
Դաշնակցութեան Արցախի կեդրոնական կոմիտէի ներկայացուցիչն էլ, իր հերթին, յայտարարեց, որ Դաշնակցութեան բոլոր որոշումները պարտադիր կատարւում են բոլոր դաշնակցականների կողմից, իսկ «ով էլ չի կատարում՝ դառնում է նախկին դաշնակցական»:
«Դաշնակցութեան որոշումները պարտադիր կատարւում են բոլոր դաշնակցականների կողմից: Նրանք, ովքեր որ չեն կատարում Դաշնակցութեան որոշումները, դառնում են նախկին դաշնակցականներ: Մենք ունենք նման բազմաթիւ փորձեր եւ դէպքեր: Կայ յստակ որոշում եւ կայ վերջնական որոշում: Այդ որոշումը, կարծում եմ, բոլոր դաշնակցականները կը կատարեն կանոնագրի եւ մեր սկզբունքներին համապատասխան», - յայտարարեց Իշխանեանը։
«Այսինքն, կը պատժուի՞ այն դաշնակցականը, ով կը գնայ եւ Վիտալի Բալասանեանի օգտին կը քուէարկի», - «Ազատութիւն» ռատիոկայանի այս հարցին նա արձագանգեց. - «Ես պատժի կամ խրախուսման մասին չխօսեցի»:
«Այսինքն՝ կր հեռացուե՞ն շարքերից», - այս հարցին էլ պատասխանեց. - «Ես յստակ ներկայացրի՝ ինչ որ կայ»:
Դաշնակցութիւնը Ղարաբաղում միակ կուսակցութիւնը չէ, որ սատարում է Բակօ Սահակեանին: Միւս երկու խորհրդարանական ուժերը՝ «Ազատ հայրենիք»ը եւ Արցախի ժողովրդավարական կուսակցութիւնը նոյնպէս յայտարարել են, որ կը սատարեն գործող նախագահի թեկնածութիւնը։
Դաւիթ Իշխանեանի կարծիքով՝ այս հանգամանքն ամենեւին էլ չի հակասում ժողովրդավարութեան սկզբունքներին:
Իսկ կարելի՞ է Բակօ Սահակեանին սատարելու փաստի հիման վրայ ենթադրել, որ Դաշնակցութիւնը գոհ է անցած հինգ տարիներին նախագահի վարած քաղաքականութիւնից. այս կապակցութեամբ կուսակցութեան Արցախի Կեդրոնական Կոմիտէի ներկայացուցիչը յայտարարեց. - «Անկեղծ ասեմ, անցած հինգ տարիների ընթացքը կարելի է բաժանել երկու շրջանի՝ պաշտօնավարման առաջին կէս եւ պաշտօնավարման երկրորդ կէս: Առաջին կէսը ունէր աւելի յստակ ուղղութիւն, աւելի նպատակաուղղուած, իսկ պաշտօնավարման երկրորդ ժամանակաշրջանը որոշակի հետընթաց ապահովեց այն գաղափարներից եւ սկզբունքներից, որոնք յայտարարուած էին, բնականաբար՝ յատկապէս ներքաղաքական ոլորտում: Այնուհանդերձ, ընդհանուր առումով անցած հինգ տարիները՝ ի համեմատութիւն անցեալ ժամանակների, անցեալ նախագահների պաշտօնավարման ժամանակաշրջանի, մենք կարող ենք աւելի յաջողուած եւ առաջընթաց ապահոված ժամանակաշրջան համարել»:
Լուսինէ Մուսայէլեան