Սուրիահայ Թէքէեաններու ընտանիքին պատմութիւնը անցեալ տարի յուզեց շատերը: Օրեր, շաբաթներ շարունակ մեր հերոսուհի Սէրլի Թէքէեանը սպասեց` յոյսով, որ կը վերագտնէ ընտանիքը…
Աւա՜ղ, յաջողեցաւ փրկուիլ միայն քոյրը` Արինան…
Իսկ պատմութիւնը սկիզբ կ’առնէ Սասունէն ու Այնթապէն, ուրկէ ալ կը սերին Սէրլիի հայրական ու մայրական կողմերու մեծ հայրերը: Ցեղասպանութիւնը վերապրած շատ հայորդիներու նման անոնք եւս ապաստան կը գտնեն Սուրիոյ մէջ, հոն կը կառուցեն իրենց նոր բոյնը:
18ամեայ Սէրլիի ընտանիքին մէջ բոլորը արուեստի հանդէպ մեծ սէր ունէին: Հայրը կիթառի խումբ ունէր Սուրիոյ մէջ, մայրն ալ դաշնակահարուհի էր, որ վերջին տարիներուն, երբ ընտանիքը Սուրիայէն Լիբանան տեղափոխուեցաւ, կը դասաւանդէր Պէյրութի Համազգայինի դպրոցէն ներս:
Միայն թէ Սէրլիի միտքը անընդհատ Հայաստանի հետ էր, ու անցեալ տարուան Ապրիլին եկաւ Երեւան` մեծ-մօր ու քեռիին մօտ: «Ինծի Երեւան բերողը Աստուած էր, Երեւանը ինծի համար աշխարհի կեդրոնն էր կարծես»,- յիշելով մէկ տարուան վաղեմութեան դէպքերը` «Հայերն Այսօր»ին կը պատմէ Սէրլին:
Մինչ Սէրլին կը հաստատուի Երեւանի մէջ, կը յաճախէ այստեղ դպրոց ու նոր ընկերներ ձեռք կը բերէ, ընտանիքը` հայրը, մայրը, մեծ մայրը, 19ամեայ քոյրն ու 10նամեայ եղբայրը կ՚որոշեն Պէյրութէն նաւով հասնիլ Թուրքիա, յետոյ` Յունաստան, որպէսզի հոնկէ ալ տեղափոխուին Գերմանիա` Սէրլիի մօրաքրոջ մօտ:
Այս ընտանիքին, ցաւօք, միասին ըլլալ վիճակուած չէր:
Թուրքիայէն Յունաստան ճանապարհին նաւը կը խորտակուի, եւ Սէրլիի ընտանիքին 4 անդամները կը խեղդուին` մայրը, հայրը, մեծ մայրն ու 10նամեայ եղբայրը: Կը փրկուի միայն քոյրը` Արինան, որ 4 ժամ լողալէ յետոյ կը հասնի Իզմիր, եւ այսօր քրոջ հետ միասին կ՚ապրի Երեւանի մէջ:
Այդ ծանր օրերու ապրումներուն մասին խօսելու պահուն` Սէրլին չի կրնար թաքցնել յուզմունքը, բայց անգամ այդ պարագային անոր աչքերուն մէջ սէրը կը խօսի, եւ ոչ դառնութիւնը: Ի դէպ, Սէրլին իր անունը պարզօրէն այդպէս ալ կը մեկնաբանէ` սիրով լի…
«Այսքան կորուստներէ ետք կը հասկնաս, որ միայն «մարդ» ըլլալով` անհնար է խաղաղութիւնը վերապրիլ, պէտք է նաեւ աստուածայինը, վերերկրայինը… Հաւատքն է, որ կը փրկէ զիս»,- կ՚ըսէ 18ամեայ հայուհին, որ այդչափ փորձութիւններու մէջէն անցնելէ ետք ալ լի է կենսուրախութեամբ, հայրենիքի հանդէպ սիրով ու ապագայի ծրագիրներով:
Սէրլին այս տարի աւարտեց դպրոցը ու կը մտածէ ձեւաւորող դառնալու մասին: Դեռ չէ որոշած ո՛ր համալսարանը դիմէ, բայց համոզուած է` ի՛նչ ուղի ալ, որ ընտրէ, հայրենիքի ու արուեստի հանդէպ սէրը չի փոխուիր:
ՋՈՒԼԻԵՏԱ ՄԱԹԵՒՈՍԵԱՆ