Թրքական «Տողան» լրատու գործակալութիւնը կը հաղորդէ, որ Տիգրանակերտի Ս. Կիրակոս եկեղեցւոյ վերակառուցման աշխատանքները կը շարունակուին: 2010-ին վերակառուցուած եկեղեցին մինչեւ հիմա  զանգ չունէր:

Գործակալութիւնը կը նշէ, որ եկեղեցւոյ 100 քիլոկրամ կշռող պրոնզէ զանգը պատրաստուած է Մոսկուայի մէջ: Անիկա կրկնօրինակն է 1915-ին ռմբակոծումի պատճառով վնասուած զանգին: Եկեղեցւոյ գմբէթը  ռմբակոծուած էր շրջակայ մզկիթներու մինարէներէն բարձր ըլլալուն պատճառաբանութեամբ:
Նոր զանգը արդէն տեղափոխուած է Տիգրանակերտ եւ 97 տարի ետք‘ 4 Նոյեմբերին դարձեալ պիտի ղօղանջէ:
Հակառակ անոր որ եկեղեցին 2010-ին վերակառուցուած եւ վերաբացուած է, սակայն անոր նորոգման աշխատանքները տակաւին չեն աւարտած:
Տիգրանակերտի Ս. Կիրակոս հայկական եկեղեցին կառուցուած է 1376-ին: Անիկա իբրեւ հայկական եկեղեցի ծառայած է մինչեւ 1915, որմէ ետք վերածուած է բամպակի պահեստանոցի: 1960-ին երեք հազար քառակուսի մեթր տարածք ունեցող եկեղեցին դարձեալ հոգեւոր ծառայութիւն մատուցած է, սակայն 1980-էն ետք դարձեալ լքուած է:
Եկեղեցին վերջին անգամ վերաբացուած է 2010-ին: