Թուրքիոյ իշխանութիւնները կ՛ուսումնասիրեն Գերմանիոյ խորհրդարանին  (Պունտեսթակին) կողմէ Հայոց Ցեղասպանութեան ճանաչման բանաձեւին հակադարձելու իրենց ունեցած կարելիութիւններուն մասին:  Յունիս 13ին այս մասին յայտարարեց Թուրքիոյ փոխվարչապետ Նուրետտին Ճանիքլի:

«Չենք կրնար անտարբեր մնալ բանաձեւին նկատմամբ: Աշխատանք կը տարուի այդ որոշումը չեղեալ յայտարարելու ուղղութեամբ, միաժամանակ կ՛ուսումնասիրուի, թէ ի՛նչ քայլերու կարելի է դիմել, եթէ բանաձեւը չբե-կանուի», աւելցուց փոխվարչապետը կառավարութեան ժողովէն ետք։
Ըստ թրքական մամուլի հաղորդումներուն, փոխվարչապետը նաեւ նշեց, թէ ժողովը որոշում չէ տուած Գերմանիոյ կողմէ Ինճիրլիքի ռազմական խարիսխը օգտագործուելու հարցով։ Յստակացնենք, որ բանաձեւի վաւերացումէն առաջ, Գերմանիա փափաք յայտնած էր ընդարձակելու խարիսխին մէջ գտնուող գերմանական օդանաւերու գործունէութեան ծաւալը։ Ներկայիս այդ օդանաւերը հոն կը գտնուին, նպաստելու համար «Իսլամական պետութեան» դէմ պայքարին։