Թուրքիոյ վարչապետի նախկին խորհրդական Էթիեն Մահճուբեան իր հերթական յօդուածին մէջ անդրադարձած է Թուրքիոյ մէջ հայկական հարցի քննարկման խնդիրին:
Ան կը գրէ. «Հայերու` մեծ յոյսերով, իսկ թուրքերու` մեծ մտահոգութեամբ սպասուած Ապրիլ 24-ը բաւական մեղմ մթնոլորտի մէջ անցաւ: Սակայն100-ամեակի խորհրդանշական իմաստը ենթադրել կու տար, որ ատիկա աւելի ծայրայեղական մթնոլորտի մէջ պիտի անցնի:
«Թուրքիոյ պաշտօնատարներուն կողմէ Հռոմի պապի, Վլատիմիր Փութինի կամ Գերմանիոյ նախագահ Կաուքի հասցէին հնչեցուցած կարծր պատասխանները թող չշփոթեցնեն ոեւէ մէկը:
«Թուրքիոյ` վերջին երկու տարիներուն ընթացքին յղած ցաւակցական ուղերձները ռազմավարութեան մէկ մասն են, եւ անոնց խորքին մէջ երկխօսութեան կոչ կայ:
«Ինչպէս կ’երեւի` կառավարութիւնը կը փափաքի Հայկական հարցը վերածել հայերու, թուրքերու եւ քիւրտերու համար «երկխօսութիւն կատարելու» բնորդի:
«Կը նախատեսուի, որ ատով հայերու տեսակէտը աւելի պիտի ընդլայնի, միեւնոյն ժամանակ` թուրք ժողովուրդը աւելի շատ բան պիտի իմանայ, պիտի ազատի անցեալի եւ ինքնութեան վերաբերեալ նախապաշարումներէն եւ հոգեբանական մթնոլորտը պիտի հանդարտի:
«Սակայն քննարկման եւ կարգաւորման օգուտը ատով պիտի չսահմանափակուի: Հայկական հարցին շուրջ խօսիլը «Իթթիհատ վէ Թերաքի»-ի ժամանակաշրջանը իր բոլոր կողմերով դարձեալ ուսումնասիրելու կարելիութիւն պիտի տայ:
«Իշխող Արդարութիւն եւ բարգաւաճում կուսակցութիւնը կը մտահոգէ այն, որ Հայկական հարցը աշխարհի օրակարգին վրայ է եւ կ’օգտագործուի Թուրքիոյ դէմ:
«Սակայն բոլորովին ալ դէմ չէ, որ հարցը ըլլայ Թուրքիոյ օրակարգին վրայ եւ օգտագործուի իթթիհատականներուն դէմ:
«Նոր սահմանադրութեան պատրաստման ու «Նոր Թուրքիա»-ի ձեւաւորման այս շրջանին այդպիսի քննարկման ենթահողը իշխանութեան օգտին պիտի ըլլայ…
«Արդարութիւն եւ բարգաւաճում կուսակցութիւնը կը փափաքի հանրապետութիւնը աւելի բազմակարծիք եւ օրինական հիմքի վրայ դնել: Հայկական հարցի «տեղայնացումը» այդ ճամբան աւելի պիտի արագացնէ»: