Թուրքիոյ իշխանամէտ «Ենի Շաֆաք» թերթը գրած է, թէ թուրք այլախոհ կրօնական Ֆեթուլլահ Կիւլեն Հայոց Ցեղասպանութեան իրողութիւնը ընդունած է 1965ին, Պոլսոյ հայոց պատրիարքին գրած նամակին մէջ։ Թերթը ձեռք բերած է Պոլսոյ հայոց պատրիարք Շնորհք Գալստեանին հասցէագրուած 1965ի Մայիս 6ին գրուած նամակը, ուր ան գործածած է «մեծ ցեղասպանութիւն» բառակապակցութիւնը:
Թերթը հրապարակած է Կիւլենի ստորագրութիւնը կրող վերոնշեալ նամակը, ուր կ՛ըսուի.-
«Մանկութեան տարիներէս ու մասնագիտական գործունէութեանս ընթացքին առիթ ունեցած եմ ճանչնալու մեծ թիւով հայ ընտանիքներ ու անհատներ: Այն, ինչ 1915 թուականին իրականացուած է հայերու նկատմամբ, մեծ ցեղասպանութիւն է եւ այդ առանց նզովելու չեմ կրնար յիշել: Կարդացած եմ, թէ սպանուածներու շարքին ինչպիսի՜ մեծ մարդիկ եղած են ու յարգանքով կը յիշեմ զանոնք: Կարեկցանքով կը դատապարտեմ ձեր մեծ մարգարէ Յիսուսի սերունդներու սպանութիւնը տգէտ իսլամ քաղաքացիներու կողմէ: Այս առիթով, ձեզ անսահման շնորհակալութիւնս կը յայտնեմ եւ Աստծումէ կը խնդրեմ, որ այս հողերու արժանի զաւակներ՝ մեր հայ հայրենակիցները եւ յոյն քաղաքացիները, իրենց սիրելի թուրք եղբայրներուն հետ, խաղաղութեան ու բարեկեցութեան մէջ ապրին»: