Մէկ օր առաջ, Յունաստանի պետական հեռատեսիլի անակնկալ փակման լուրին յաջորդեց բողոքի ալիք, աշխատողներու եւ քաղաքացիներու մեծամասնութեան կողմէ։ Ընդունելով հանդերձ պետական հեռատեսիլի անբաւարար կառավարման եւ տնտեսական մեծ մսխումներու իրողութիւնը,

հանրային կարծիքը կը մերժէ հեռատեսիլը փակելու որոշումը, խստօրէն դատապարտելով գործելաձեւը որ որդեգրուեցաւ կառավարութեան կողմէ։
Երէկ գիշեր, երկրորդ անգամն ըլլալով, Այիա Փարասքէվիի մէջ հեռատեսիլի կայանին առջեւ բազմաթիւ քաղաքացիներ համախմբուեցան, զօրակցութիւն յայտնելով աշխատողներուն եւ պահանջելով չեղեալ յայտարարել փակման որոշումը։ Մինչ այդ աշխատողները իրենց միջոցներով ճիգ կը տանին յայտագիրները շարունակելու, հեռարձակման այլ ուղիներ որոնելով։
Յունաստանի աշխատաւորական երկու մեծագոյն սենտիքաները 24 ժամուայ գործադուլ յայտարարած են այսօր Հինգշաբթի, ուր մասնակցութիւն կը բերէ երկրի աշխատաւորական ուժի ջախջախիչ մեծամասնութիւնը:
Եւրոպական Խորհրդարանէն ներս խօսք առնելով պատգամաւորներ՝ դատապարտեցին փակման որոշումը, յանցանքի բաժին ալ գտնելով եւրոպացի յանձնակատարներուն վրայ, որոնք կրճատումներու եւ հանրային պաշտօնեաներու թիւի սահմանափակման պահանջներ ներկայացուցած են։  Այս դատապարտանքի խօսքերուն պատասխանեց եւրոպացի յանձնակատար Օլի Ռէն, դիտել տալով թէ իրենք չեն պահանջած պետական կայանի փակումը, բայց նոյն ժամուն չեն ժխտեր Յունաստանի կառավարութեան իրաւասութիւնը, երկրի պետական համակարգը կառավարելու մարզէն ներս։
Համախոհական կառավարութեան մասնակցող մնացեալ երկու ղեկավարները իրենց հակառակութիւնը յայտնած են որդեգրուած գործելաձեւին առումով։