Նոյն պահուն թրքական ամբողջ նաւատորմը Եգէականի մէջ
ռազմական ցուցադրութիւն կը կատարէ

Թուրքիոյ պարագային սովորական մարտահրաւէր կրնայ նկատուիլ Անգարայի գրգրիչ կեցուածքը, որ կ'որոշէ Եգէական ծով դուրս բերել թրքական ամբողջ նաւատորմը, ռազմական վարժութիւններ կատարելու պատճառաբանութեամբ... Յունական կղզիներուն եւ մայր ցամաքամասի միջեւ կը շրջագային S-70 տիպի ուղղաթիղներ եւ նաւատորմի հետ համագործակցող CN-235 տիպի օդանաւներ, որ հետեւողականօրէն կը խախտեն յունական ազգային օդային տարածքը:

Ծայր աստիճան գրգրիչ է Անգարայի կեցուածքը, որ կը յայտարարէ թէ «երկխօսութեան» մէջ է Աթէնքի հետ, բայց նոյն պահուն զինուորական մեծաթիւ ուժեր կը կեդրոնացնէ Եգէականի մէջ:

Երէկ պաշտօնական այցելութեամբ Թուրքիա ժամանեցին Յունաստանի վարչապետ Անտոնիս Սամարաս, պաշտպանութեան նախարար Փանոս Փանաեոթոփուլոս, արտաքին գործոց նախարար Տիմիթրիս Աւրամոփուլոս եւ նախարարաց խորհուրդի գրեթէ կէս կազմը: Այցելութեան նպատակն է «Համագործակցութեան բարձրագոյն խորհուրդի» համատեղ նիստի գումարումը եւ 25 տարբեր համաձայնագիրներու ստորագրումը:

Երէկ Պոլսոյ մէջ կայացաւ վարչապետ Սամարասի հանդիպումը Թայիփ Էրտողանի հետ, որ փութաց Յունաստանի հետ համագործակցութիւնը «ռազմավարական» բնորոշելու: Ան յայտնեց թէ «պիտի արժեւորուին փոխադարձ յարաբերութիւններու ներկայ հանգրուանը եւ պիտի քննարկուին յառաջիկայ մեր քայլերը»: Ան ազդարարական ոճով խօսեցաւ «նախապաշարումները եւ նախադրեալները մէկդի ձգելու մասին» ուղղակիօրէն ակնարկելով Եգէականի ծովային տարածքներու պատկանելիութեան: