Հայաստանի նախագահ Սերժ Սարգսեան երէկ Վատիկանի մէջ ներկայ գտնուեցաւ Հռոմի Ֆրանչիսկոս Ա. պապի պաշտօնի ստանձնման պատարագին:
Հանրապետութեան նախագահը շնորհաւորեց սրբազան քահանայապետը անոր ընտրուելուն եւ կաթողիկէ աշխարհի հովուապետի առաքելութիւնը ստանձնելու առիթով:
Նախագահ Սարգսեան նշեց, որ աշխարհի մէջ առաջինը պետականօրէն քրիստոնէութիւնը ընդունած հայ ժողովուրդին համար այս իրադարձութիւնը առանձնայատուկ խորհուրդ եւ իմաստ ունի: Նախագահը ուրախութեամբ նշեց, որ Ս. Պետրոսի նուիրապետական աթոռին վրայ նստած է հայ ժողովուրդի բարեկամը, որ քաջատեղեակ է հայ մշակոյթին եւ հայոց պատմութեան, ինչ որ ան բազմիցս փաստած է Արժանթինի մէջ իր գործունէութեան ընթացքին:
Յայտնենք, որ Վատիկանի երէկուան արարողութեան ընթացքին ուշագրաւ էր նաեւ Ս. Պետրոսի հրապարակին վրայ հայ հաւատացեալներու ներկայութիւնը, որոնք բարձրացուցած էին Եռագոյն դրօշակներ: