Մերձաւոր  Արեւելքի ամենամեծ  հայկական եկեղեցւոյ՝ Տիգրանակերտի  Սուրբ Կիրակոս  եկեղեցիին  մէջ  զանգը  ղօղանջեց...

Կիրակի Նոյեմբեր 4-ին սուրբ պատարագ մատուցուեցաւ Տիգրանակերտի Ս. Կիրակոս եկեղեցւոյ մէջ, ինչպէս շատոնց արդէն յայտարարուած էր:

Պատարագին մասնակցելու նպատակով ժամանած էին մեծ թիւով հայեր, սփիւռքի տարբեր օճախներէ, ինչպէս նաեւ քիւրտեր: Նախապէս, օրհնութեան յատուկ արարողութիւն տեղի ունեցած էր Մոսկուայի մէջ պատրաստուած զանգակատան համար:
Պոլսոյ հայոց պատրիարքարանը կը շարունակէ  Տիարպեքիրի (Տիգրանակերտ) քաղաքին մէջ Սուրբ Կիրակոս եկեղեցւոյ վերանորոգման եւ վերականգնման աշխատանքները: Եկեղեցին  փլուզման վտանգի առաջ գտնուած էր,  30 տարիէ աւելի անգործածելի վիճակի մէջ ըլլալով:

Ինչպէս կը հաղորդէ «Արմենփրես»-ը՝  վկայակոչելով CNN-Turk-ը, Հայոց Ցեղասպանութեան տարիներուն, եկեղեցւոյ խաչով օժտուած գմբէթը՝ քաղաքին մէջ ամենաբարձր շէնքն էր. այդ իսկ պատճառով ազգայնականները պայթեցուցած էին եկեղեցին եւ կործանած  եկեղեցւոյ զանգակատունը: Պոլսոյ պատրիարքարանի ջանքերով եկեղեցւոյ համար նոր զանգակ պատրաստուեցաւ Մոսկուայի մէջ, որ արդէն բերուեցաւ  Տիարպեքիր: Օրհնութեան արարողութենէն ետք զանգը շուտով պիտի  տեղադրուի զանգակատան վրայ:
Տիարպեքիրի Սուրբ Կիրակոս եկեղեցին Մերձաւոր Արեւելքի մէջ  հայկական համայնքին պատկանող ամենամեծ եկեղեցին է: