Հալէպի հայաշատ եւ քրիստոնէական թաղամասերուն մէջ իրավիճակը համեմատաբար հանգիստ է: Այս մասին «Արմենփրես»-ին տեղեկացուց Բերիոյ թեմի ազգային առաջնորդարանի մամլոյ խօսնակ Ժիրայր Ռեյիսեանը,  աւելցնելով, որ որոշ թաղամասերու մէջ կը շարունակուին  բախումները:

Ռեյիսեան վստահեցուց թէ հանգիստ իրավիճակին զուգահեռ՝ մարդիկ ջանք կը տանին վերադառնալու բնականոն կեանքին:
Ինչ կը վերաբերի Հալէպի մօտ առեւանգուած հայերուն, Ռեյիսեան ըսաւ, որ դեռ փոփոխութիւն կամ նորութիւն չկայ:  Անոնց ազատ արձակման ուղղութեամբ տարուած աշխատանքները կը շարունակուին:
Զինեալ ապստամբները Հոկտեմբեր 29-ի երեկոյեան ժամը 18:00-ին, Պէյրութէն Հալէպ  ուղեւորուող «Զէյթունի Դուրզ» ընկերութեան պատկանող քաղաքացիական հանրակառքէն առեւանգած էին 11 ճամբորդներ, որոնցմէ եօթը՝ հայեր:
Բախումները կը շարունակուին սուրիական այլ քաղաքներու մէջ եւս: Մօտ 19 ամիսէ ի  վեր  շարունակուող բախումներու հետեւանքով զոհուած է 30 հազարէ աւելի մարդ. այդ թիւին մէջ գրեթէ չորս տասնեակ հայ կայ: