Հայաբնակ  Թաղամասերը՝
Համեմատաբար  Հանդարտ

Հալէպի թաղամասերուն մէջ բախումները կը շարունակուին, սակայն հայաբնակ թաղամասերուն մէջ իրավիճակը լարուած ըլլալով հանդերձ՝  համեմատաբար աւելի հանդարտ է: Այս մասին ԵՌԱԳՈՅՆ-ին կը յայտնեն Հալէպի  գործընկերները:

Հայկական դպրոցները կը մնան փակ, Ազգ. Քարէն Եփփէ Ճեմարանի 9-րդ եւ 12-րդ կարգի աշակերտները իրենց ուսումնական ծրագրին կը հետեւին համեմատաբար անվտանգ վայրի մէջ եւ մի քանի ընդհատումներէ ետք, այժմ դասընթացները կÿընթանան կանոնաւոր կեպով. աշակերտները հաստատակամ են, որ ոչինչ չի խանգարեր իրենց կրթութեան ընթացքը։

Հալէպի Ազգային Ծերանոցի
Պատսպարեալները
Փոխադրուեցան Աւելի Ապահով Վայր

Բերիոյ թեմի Ազգային իշխանութեան ու Հալէպի հայ երեք համայնքապետերուն համաձայնութեամբ եւ Բերիոյ թեմի առաջնորդ Շահան եպս. Սարգիսեանի կարգադրութեամբ՝  Հալէպի Ազգային ծերանոցի պատսպարեալները փոխադրուեցան այլ ապահով վայր: Այս մասին երէկ երեկոյեան Լիբանանի «Ազդակ» օրաթերթին յայտնած է Բերիոյ թեմի Ազգային առաջնորդարանի բանբեր Ժիրայր Ռէյիսեանը:
Բանբերը ընդգծած է, թէ որոշումը առնուած է նկատի ունենալով Պոսթան  Փաշա թաղամասին մէջ գտնուող ծերանոցին վտանգաւոր դիրքը: Ըստ Ռէյիսեանի՝  բախումներ տեղի կ՛ունենան նաեւ Հալէպի զանազան այլ շրջաններու մէջ, սակայն ընդհանրապէս ոչ քաղաքի կեդրոնական բաժինները:
Բերիոյ թեմի Ազգային առաջնորդարանի բանբերը նշած է, որ այս երկու օրը չեն արձանագրուած մասնաւոր մարդկային վնասներ, բայց ժողովուրդը անկասկած նախազգուշական քայլերու կը դիմէ՝  վտանգը նուա- զագոյնին հասցնելու առումով:

Գագիկ Ծառուկեան «Օգնի՛ր Եղբօրդ» Նախաձեռնութեան Նուիրեց
15 Միլիոն Դրամ

Նախապէս տեղեկացուցած էինք, որ «Օգնի՛ր եղբօրդ» նախաձեռնող խումբը դրամատնային հաշիւ բացած է՝  Սուրիոյ մէջ բնակող հայերուն օգնելու նպատակով: «Երկիր»-ի հետ զրոյցին ընթացքին Բարգաւաճ Հայաստան կուսակցութեան նախագահ Գագիկ Ծառուկեանի մամլոյ քարտուղար Իվեթա Տոնոյեան յայտնեց, որ Գագիկ Ծառուկեան անձամբ պիտի մասնակցի «Օգնի՛ր եղբօրդ» նախաձեռնութեան:
Բարգաւաճ Հայաստան կուսակցութեան նախագահը նախաձեռնութեան դրամատնային հաշիւին արդէն իսկ փոխանցած է 15 միլիոն դրամ:

ՇԻՔԱԿՈՅԻ ՄԷՋ ՁԵՌՆԱՐԿ
ՆՈՒԻՐՈՒԱԾ ՍՈՒՐԻԱՀԱՅՈՒԹԵԱՆ

Շաբաթ, Սեպտեմբեր 29-ին, Շիքակոյի Կլենվիու շրջանէն ներս գտնուող Հայ Կեդրոնէն ներս, տեղի ունեցաւ ձեռնարկ մը կազմակերպուած տեղւոյն «Քրիստափոր»  կոմիտէութեան կողմէ: Թէեւ ձեռնարկը Հ.Յ.Դաշնակցութեան 112-ամեակին առթիւ էր, սակայն նկատի ունենալով Սուրիոյ կացութեան վատթարացումն ու տեղւոյն գաղութին դժուարութիւնները, հաւաքը նուիրուած էր Սուրիահայ գաղութին: Բացման խօսքը կատարեց Արմէն Փափազեան, որ հրաւիրեց Վազգէն Այվազեանը, ներկայացնելու Հ.Յ.Դաշնակցութեան կատարած դերը Սուրիոյ մէջ: Այվազեան  մանրամասնօրէն տեղեկացուց Հ.Յ.Դ.-ի կատարած աշխատանքի մասին, իր քոյր միութիւններու միջոցաւ:
Ապա, Համազգայինի անունով խօսք առաւ Յարութիւն Միքայէլեան, որ յուշեր պատմեց Հալէպի իր մանկութենէն, որոնք յուզում պատճառեցին: Յաջորդաբար  խօսք առաւ Պոսթընէն ժամանած «Հայրենիք»ի խմբագիր` Զաւէն Թորիկեան, որ ներկայացուց Հալէպի ներկայ իրավիճակը: Ապա, տեղի ունեցաւ հարց-պատասխան: Վերջին խօսք առնողը եղաւ «Քրիստափոր» կոմիտէութեան ներկայացուցիչ Կրէկ Պետեան, որ կոչ ուղղեց բոլորին մասնակցելու դրամահաւաքի արշաւին: Այս առթիւ, կարելի  եղաւ հաւաքել ինը հազար տոլար:
Նշենք թէ, ձեռնարկը սկսած էր տեղւոյն Հ.Մ.Ը.Մ.-ի սկաուտական կազմի տողանցքով եւ քայլերգներու երգեցողութեամբ, որմէ ետք, շրջանի հովիւ Տէր Զարեհ Սարհակեան կատարեց օրուան աղօթքը:

ՏԻԹՐՈՅԹԻ ՄԷՋ
ԺԱՄԵՐԳՈՒԹԻՒՆ ԵՒ ՄՈՄԱՎԱՌՈՒԹԻՒՆ
ՍՈՒՐԻՈՅ ՄԷՋ ԶՈՀՈՒԱԾ
ՀԱՅՈՐԴԻՆԵՐՈՒՆ ՀԱՄԱՐ

Նախաձեռնութեամբ եւ կազմակերպութեամբ Տիթրոյթի Սուրբ Սարգիս Հայոց Առաքելական Եկեղեցւոյ, հոգեւոր հովիւ Արժպ. Տ. Հրանդ քհնյ. Գէորգեանի եւ հոգաբարձութեան, Սուրբ Սարգիս եկեղեցւոյ մէջ, Սուրիոյ հայ գաղութի խաղաղութեան համար  եւ  քաղաքացիական պատերազմի ընթացքին զոհուած աւելի քան 20 հայորդիներու յիշատակին, ինչպէս նաեւ անհետացած հայորդիներու ազատ արձակման համար հոգե- հանգստեան արարողութիւն մը տեղի ունեցաւ:  Յատուկ հրաւիրագիրներ  ուղարկուած էին գաղութիս մէջ գործող յարանուանութեանց հոգեւոր հայրերուն եւ իրենց համայնքի զաւակներուն: Ներկայ էր Հայ Աւետարանական Համաշխարհային Խորհուրդի ատենապետ՝  Տիթրոյիթի Հայ Աւետարանական Եկեղեցւոյ պատուակալ  եւ ներկայիս գործօն  հոգեւոր հովիւ վերպ. տոքթ. Վահան եւ երէցկին Թութիկեան:
Սուրբ. Վարդան Հայ Կաթողիկէ  եկեղեցւոյ հոգեւոր հովիւ Գրպտ.Անտոն Ծ. վրդ. Ադամեան քաղաքէն բացակութեան պատճառով ներկայ չի կրցաւ գտնուիլ: Ներկայ էին շուրջ հարիւր հաւատաց եալներ, որոնք  մասնակցեցան «Սաղմոսներու» եւ «Հաւատով Խոտովանիմ» աղօթքներու ընթերցանութեան:
Խաղաղութեան ժամերգութեան եւ հոգեհանգստեան արարողութենէն ետք, երկու լեզուներով օրուայ պատշաճ խօսքը հրետորաշունչ ոճով  փոխանցեց վերպ. տոքթ. Վահան Թութիկեան: Ապա, ի նպաստ Սուրիոյ հայ համայնքին՝ եկեղեցւոյ մէջ դրամահաւաք տեղի ունեցաւ:   Տէրունական  Աղօթքի երգեցողութեամբ իր աւարտին հասաւ  «Խաղաղական» եւ հոգեհանգստեան արարողութիւնը:
Ապա ժողովուրդը կատարեց մոմավառութիւն: Այնուհետեւ ժողովուրդը ուղղուեցաւ եկեղեցւոյ յարակից «Լիլիըն Առաքելեան» սրահը, ուր եկեղեցւոյ հոգաբարձութիւնը պատշաճ հիւրասիրութիւն մը պատրաստած էր:
Հիւրասիրութենէն ետք, Շանթ ժամկոչեան սահիկներով ցոյց տուաւ Հալէպի հայածոյ շրջաններու մէջ  գործող եկեղեցական ազգային,  բարեսիրական, կրթական, եւ մարզական կառոյցները, ինչպէս նաեւ  քաղաքացիական պատերազմի ընթացքին  ռմբակոծութեան թիրախ դարձած եւ փուլ եկած շէնքերը եւ վնասուած բնակարանները: