Տագնապալի աստիճաններու հասած է եւրոպական տնտեսական ճգնաժամը, Սպանիոյ դրամատուներուն ի նպաստ փրկարարական նախաձեռնութիւններէն հազիւ 24 ժամ յետոյ:
Սպանական պարտատոմսերու զիջումը աննախադէպ բարձր մակարդակներու հասած է, մինչ նոյն պահուն, Աւստրիոյ տնտեսութեան նախարարուհին Իտալիոյ ի նպաստ աջակցութեան մեքանիզմի դերակատարութիւնը կը կանխատեսէ:
Քրիսթին Լակարտի նախազգուշացումէն ետք, թէ եւրոգօտիի փրկութեան համար նուազ քան 90 օրուայ ժամանակը իր աւարտին կը հասնի, Գերմանիոյռազմավարութիւնը ոչ միայն կացութիւնը չէ հանդարտեցուցած, այլ մթնոլորտը սրած է: ԱՄՆի նախագահ Պարաք Օպամայի միջազմտութիւնը նոյնիսկ ընդունելի չէ եղած Պրիւքսելի եւ Պերլինի կողմէ, ինչ որ շատ յստակ դարձած է շուկաներու մէջ ճնշումներ յառաջացնող ուժերուն մօտ, որոնք քաղաքական մութ դաշտը եւ Գերմանիոյ անզիջող դիրքորոշումը տեսնելով՝ աշխուժացուցած են Եւրոպայի հանդէպ ճնշումները:
Քաղաքական դաշտի ներկայացուցիչները եւ վերլուծաբանները կը նշեն թէ՝ եւրոգօտիէն ներս առկայ անհաւասարակշռութիւնները հետզհետէ աւելի բարդ եւ անկայուն կը դարձնեն դաշտը:
Կրակին վրայ՝ իւղ...
Եւրոպական տագնապի կրակին վրայ իւղ կուգայ սրսկելու Moody's ամերիկեան ընկերութիւնը, նուաստացնող 3 նիշի մակարդակին հասցնելով Սպանիան եւ Կիպրոսը, որոնք արդէն փրկարարական մեքանիզմի դրան առջեւ կը գտնուին: Սպանիոյ պարտատոմսերը «աղբ» որակաւորումէն հազիւ շունչ մը անդին կը գտնուին, տուեալ՝ որ անոնց զիջումի նոր ալիք պիտի ստեղծէ, երկրի փոխառութեան վարկերու համապատասխան յաւելումով:
Moody'sի այս նոր քայլը հետագայ անհանգստութիւններու եւ լուրջ մտահոգութիւններու նոր իրավիճակ պիտի ստեղծէ, եւրոգօտիէն ներս յաւելեալ ճնշումներ գործադրելու առիթ տալով: