Սուրիա բուռն կերպով դատապարտեց Միացեալ Նահանգներու արտաքին գործոց նախարար Հիլըրի Քլինթընի կողմէ կատարուած յայտարարութիւնները՝ զանոնք համարելով Միացեալ Նահանգներու կողմէ Սուրիոյ ներքին հարցերուն բացայայտ միջամտութեան յաւելեալ փաստ մը։ Քլինթըն ըսած էր, որ Սուրիոյ նախագահ Պաշշար Ասատ սպառած է իր օրինականութիւնը։ Այս մասին կը յայտնէ «Ռոյթըրզ»ը։


Սուրիացի պաշտօնական աղբիւր մը «Սանա» լրատու գործակալութեան յայտնած է, որ Քլինթընի յայտարարութիւնները գրգռիչ արարք մըն են, որոնց նպատակը ներքին տագնապի վատթարացումն է:
Միւս կողմէ՝ Ֆրանսայի վարչապետ Ֆրանսուա Ֆիյոն յայտնեց, որ վերջին օրերուն տեղի ունեցած դէպքերուն նկատմամբ ՄԱԿի Ապահովութեան խորհուրդին լռութիւնը «անտանելի» դարձած է, իսկ Ասատ «չափը անցուցած է»։ Ֆիոն նշեց, որ Ֆրանսա եւրոպական այլ պետութիւններու հետ Ապահովութեան խորհուրդին ներկայացուցած է Սուրիոյ դէմ որոշում մը, որուն դէմ արարկած են Ռուսիան եւ Չինաստանը։