«Սի.Էն.Էն.Թիւրք» կը հաղորդէ, որ Միացեալ Նահանգներու արտաքին գործոց նախարարութեան մամլոյ քարտուղար Վիքթորիա Նուլընտ յայտնած է, թէ Միացեալ Նահանգներու արտաքին գործոց նախարար Հիլըրի Քլինթըն 15 Յուլիսին երկօրեայ այցելութեամբ մը Թուրքիա պիտի մեկնի։


Նուլընտ ըսած է, թէ Քլինթըն Թուրքիոյ մէջ պիտի մասնակցի Պոլսոյ մէջ կայանալիք Լիպիոյ հարցով կապի խմբակի հանդիպումին։
Ան այցելութեան ընթացքին հանդիպումներ պիտի ունենայ Թուրքիոյ նախագահ Ապտալլա Կիւլի, վարչապետ Ռեճեփ Թայիփ Էրտողանի եւ արտաքին գործոց նախարար Ահմեթ Տաւութօղլուի հետ։ Հանդիպումներուն ընթացքին պիտի քննարկուին մասնաւորաբար Լիպիոյ եւ Սուրիոյ վերաբերող հարցեր։
Քլինթըն Թուրքիայէն պիտի մեկնի Յունաստան, ապա Հնդկաստան։
Նշենք, որ Ուրբաթ օր Քլինթընի եւ Տաւութօղլուի միջեւ տեղի ունեցած է հեռաձայնային հաղորդակցութիւն մը, որուն ընթացքին կողմերը քննարկած են տարածաշըրջանային հարցերը եւ 15 Յուլիսին Պոլսոյ մէջ կայանալիք Լիպիոյ հարցով կապի  խմբակի հանդիպումին առնչուող հարցեր։