«Թրիպիւն տը Ժընեւ» օրաթերթը կը հաղորդէ, որ Ժընեւի տեղական իշխանութիւնները արտօնած են «Թրեմպլէ» պուրա
կին մէջ Հայոց Ցեղասպանութեան յիշատակին նուիրուած «Յիշողութեան լապտերներ» յուշարձանին տեղադրումը: Ժընեւեան օրաթերթը կը նշէ, որ թէեւ յուշարձանի գաղափարը առաջացած էր շուրջ տասնամեակ մը առաջ, սակայն հայկական համայնքը ատոր տեղադրումին արտօնութիւնը ստացաւ միայն անցեալ շաբաթ:
Բայց եւ այնպէս, պայքարը դեռ չէ աւարտած. փաստաբան Իվ Նիտեկեր յայտնած է, որ պիտի բողոքարկէ յուշարձանի տեղադրման մասին որոշումին դէմ, որովհետեւ ունի այս հարցին վերաբերեալ 14 քաղաքացիի դիմում-բողոքները:
«Թրեմպլէ պուրակը կանաչ տարածութիւն է: Հետեւաբար, ոչինչ կրնայ այստեղ կառուցուիլ` բացառութեամբ հանրային հետաքրքրութիւն ներկայացնող կառոյցներէն, որոնք անմիջական կապ ունին տարածքի օգտագործման հետ: Ասիկա այդ դէպքը չէ, որովհետեւ դիմողը սեփական կազմակերպութիւն է, որ կը հետապնդէ սեփական շահերը»,- ըսած է փաստաբանը: Ան նշած է, որ 9 մեթր բարձրութիւն ունեցող լապտերները կրնան վատ ազդեցութիւն ունենալ պուրակին վրայ:
Անդրադառնալով Ժընեւի քաղաքային իշխանութիւններուն տուած որոշումին` նախագիծի գործավար Շթեֆան Քրիսթենսեն նշած է, որ կասկած չունի իրենց ծրագիրի յաջողութեան վերաբերեալ: «Ասիկա կարեւոր քայլ է, մենք գոհ ենք»,- ըսած է ան` համոզում յայտնելով, որ յուշարձանի տեղադըրման դէմ հանդէս եկողները քաղաքական շարժառիթներ ունին: «Ցաւալի եւ ապշեցուցիչ է տեսնել, որ այստեղի մարդիկ ժխտողներու կողմէ են»,- ըսած է Քրիսթենսեն: