«Ճանաչել զիմաստութիւն եւ զխրատ, իմանալ զբանս հանճարոյ»: Շնորհաւոր Սասուն քաղաքամասի «Թունեան» աղջ. տարր. դպրոցի եւ «Սասուն» մանկապարտէզի նորակառոյց շէնքի բացումը:
Ահա նման վերտառութեամբ գրուած պաստառով էր զարդարւած նորակառոյց դպրոցի ճակատը, որը տարիների սպասումից յետոյ՝ նոր եռանդ ու լիցք հաղորդեց ոչ միայն յիշեալ քաղաքամասի համայնքին ու այդ դպրոցը յաճախող աշակերտներին, այլեւ՝ թեհրանահայութեանը:
«Ալիք» օրաթերթը կը հաղորդէ թէ անցնող Չորեքշաբթի երեկոյեան դպրոցի մուտքը իրենց շարքերով զարդարած էին աշակերտուհիները եւ անհամբեր սպասում էին պաշտօնական բացման հանդիսութեան: Դպրոցի մուտքին ամրացուած ժապաւէնը, իր օրհնութեան խօսքից յետոյ, հատեց Թեհրանի հայոց թեմի առաջնորդ Տ. Սեպուհ արք. Սարգսեանը՝ Թ. Հ. Թ. Պատգամաւորական ժողովի ատենապետ Գէորգ Աբուլեանի, Թ. Հ. Թեմական խորհրդի փոխ ատենապետ Վարուժ Յովհաննիսեանի ուղեկցութեամբ:
Ապա սրբազան հօր գլխաւորութեամբ նորակառոյց դպրոցի օրհնութեան կրօնական արարողութիւն իրականացաւ դպրոցի պատշգամբում, ապա Իրանի պետական հիմնով ու Տէրունական աղօթքով սկսուեց նախատեսուած ծրագիրը: Ծրագիր, որը մէկտեղւած էր ոչ միայն յաւուր պատշաճի արտայայտութիւններով, այլեւ՝ «Սասուն» մանկապարտէզի եւ «Թունեան» դպրոցի աշակերտների գե-ղարուեստական կատարումներով՝ երգերով ու ասմունքներով եւ դպրոցի հիմնօրհնէքի, վերակառուցման ու տեղափոխման մասին պատրաստուած բովանդակալից ժապաւէնի ցուցադրումով:
Ներկաներին ողջոյնի խօսք ասաց «Թունեան» դպրոցի փոխ տեսչուհի Շաքէ Աւետեանը, որի արտայայտութիւնները յուզումնալից, սակայն միաժամանակ ուրախութեամբ էին տոգորւած:
Թ. Հ. Թ. Կրթական խորհրդի ատենապետ Իռէն Աբնուսեանը իր ելոյթի ընթացքում վերակառուցուած դպրոցի մասին այսպէս արտայայտուեց. «Դպրոց, որը անցնելով 54-ամեայ իր ուղին, վերաշինուած ու արդիականացած, այսօր իր դռներն է բացում մեր նոր սերունդի առջեւ, որպէսզի կրթի ու դաստիարակի դարձեալ սերունդներ, որոնք կը դառնան մեր մտաւորականները, բարերարները եւ նուիրուած ազգայինները, քանի որ առաւել քան երբեւէ՝ կարիքն է զգացւում արհեստավարժ, բանիմաց եւ նախանձախնդիր ազգայինների»:
Ներկաներին իր խօսքը փոխանցելու համար՝ բեմ հրաւիրուեց Իրանի Իսլամական խորհրդարանում հիւսիսային իրանահայութեան պատգամաւոր ճրտգ. Գէորգ Վարդանեանը:
Նա իր արտայայտութիւնների ընթացքում շեշտեց. «Երկար ժամանակներից, չար ու բարի խօսքերից, լաւ ու վատ օրերից յետոյ, այսօր կանգնած ենք այս գեղեցիկ շէնքի շեմին՝ շնորհաւորելու մեր բալիկներին իրենց նորակառոյց շէնքը, շնորհաւորելու մեր նոր սերունդին իրենց նոր տունը, այն տունը, ուր յոյս ունենք, որ իրենց ուսուցիչների, տեսուչների եւ բանիմաց պատասխանատուների պատասխանատւութեան զգացմունքի ներքոյ՝ դաստիարակւեն որպէս լաւ հայեր»:
Վերջում բեմ հրաւիրուեց թեմակալ առաջնորդը՝ իր օրհնութեան խօսքն ա-սելու հոծ թիւով համախմբուած հայրենակիցներին:
Սրբազան Հայրը ողջունելով վերակառուցուած դպրոցի բացումը՝ ասաց. «Անցնող տարիների ընթացքում սա երրորդ կրթական հաստատութիւնն է, որ կառուցւում է՝ «Շանթ» տարր. դպրոցը, «Մարիամեան» ուղեցոյց դպրոցը եւ ահա՝ «Սասուն» մանկապարտէզն ու «Թունեան» դպրոցը: Սրանք արտաքին վկայութիւններն են մարդկային կեանքի վերանորոգ ընթացքով շարունակման»:
Թեմակալ առաջնորդը նշեց, որ երեք տարի առաջ Արամ Ա Վեհափառ հայրապետի ներկայութեամբ կատարուեց շէնքի հիմնօրհնէքը, իսկ այսօր բացումն է կատարւում կրթական այս երկու նորակառոյց հաստատութիւնների եւ աւելացրեց. «Ամէն մի կրթական հաստատութիւն մի միջնաբերդ է՝ ժողովրդի գոյատեւման, այդ ժողովրդի ազգային եւ հոգեւոր արժէքների պահպանման համար»: