Հայկական կեդրոններ կը շարունակեն ջրամատակարարման ծառայութիւն կատարել
1 Յուլիս.- «Բերիոյ նիուզ» կը հաղորդէ, որ Հալէպ կը շարունակէ դիմագրաւել ջուրի սաստիկ տագնապ:
Արդարեւ, ամիսէ մը ի վեր Հալէպի մէջ ջուրի ընկերութեան կողմէ ջուրի հոսքի դադրեցման պատճառով, հերթաբար ջրամատակարարում կը կատարուի քաղաքի զանազան շրջաններուն մէջ:
Քաղաքի տարբեր կառոյցներ, ըլլան մզկիթներ կամ որոշ շէնքեր, որոնց կարգին նաեւ հայկական ակումբներ, կեդրոններ եւ եկեղեցիներ, որոնք ջրհորներ եւ ջրամբարներ ունին, կը շարունակեն ջուրի մատակարարման ծառայութիւնը կատարել անվճար:
Հայահոծ շրջաններէն Սիւլէյմանիէի մէջ «Սիմոն Վրացեան» կեդրոնի խնամակալութեան հովանաւորութեամբ ջրամատակարարում տեղի կ՛ունենայ Ազգային «Կիւլպենկեան» վարժարանէն: Օրեր շարունակ հազարաւոր բնակիչներ անխտիր կարգ ու կանոնը առանց խախտելու կը ստանան իրենց ուզած քանակի ջուրը‘ անվճար:
Կ՛արժէ նշել, որ «Սիմոն Վրացեան» կեդրոնի տղաքը հերթականօրէն օրական 7-9 ժամ տեւողութեամբ ջուր կը բաժնեն: Ջրամատակարարում կը կատարուի նոյնիսկ շարժողական ջրամբարներով: