Սուրիոյ քաղաքացիական պատերազմի սկիզբէն իսկ, Հալէպի հայկական համայնքը, գտնուելով կառավարական եւ ընդիմմութեան ուժերուն ընդհարումի գօտիին միջեւ, մինչեւ այսօր կ'ապրի ծանր օրեր, տալով տասնեակներով զոհեր, հարիւրաւոր վիրաւորներ, ինչպէս նաեւ կրելով հսկայական վնասներ համայնքային եւ սեփական կառոյցներու:
Վերջին շրջանին կացութիւնը վատթարացած է, քանի շրջանին մէջ, կառավարութեան դէմ հակադրուող ուժերը, Ալ Քայտայի հետ կապակցութիւն ունեցող ուժերն են:
Կասկածէ վեր է թէ ծայրայեղական ընդդիմադիր այս ուժերը, զինուած Թուրքիոյ կողմէ եւ մուտք գործած Թուրքիայէն, իբրեւ իրենց հիմնական թիրախը ընտրած են յարձակումները անզէն ժողովուրդին վրայ: Կարճ ժամանակ առաջ, մուտք գործելով Թուրքիայէն, յարձակեցան հայաբնակ Քեսապին վրայ, պատճառ դառնալով որ ամբողջ բնակչութիւնը տեղահանուի եւ ապաստան գտնէ Լաթաքիոյ մէջ: Վերջին օրերուն նոյն ուժերը, մուտք գործելով նորէն Թուրքիայէն, սկսած են անդադար հրթիռակոծումը Հալէպի հայկական թաղամասերուն:
Այս առումով Եւրոպայի Հայ Դատի գրասենեակը հետեւեալ նամակը ուղղած է Քաթրին Աշթընին:
Ձերդ գերազանցութիւն,
Վերջերս, Մարտ 21 2014-ին Ալ Քայտայի հետ կապակցութիւն ունեցող ուժերը, յարձա- կեցան Քեսապի վրայ, որ կը գտնուի Թուրքիոյ եւ Սուրիոյ սահմանին վրայ, ստիպելով բնակչութեան լքելու իրենց օճախները եւ ապաստան գտնելու Լաթաքիա քաղաքը: Այսօր՝ ծայրայեղականները յարձակումներ կը կատարեն Հալէպի հայաբնակ թաղամասերուն վրայ եւ յատկապէս Նոր Գիւղին վրայ: Եթէ Թուրքիան չի քաջալերէր եւ նոյնիսկ չի հրահրէր այս յարձակումները, շատ դիւրութեամբ կրնար փակել իր սահմանները եւ արգիլել ծայրայեղական այս խմբակցութիւններուն ազատ շրջագայութիւնը:
Եւրոպայի քաղաքացի մեր հայրենակիցներուն անունով եւս, կոչ կ'ուղղենք ձեզի, իբրեւ ղեկավար Եւրոպական Միութեան Արտաքին Յարաբերութիւններուն, դիմելու պատշաճ քայլերուն, ճնշելու համար այն երկիրները, որոնք կը քաջալերէն «Ալ Քայտայի» մօտ գտնուող այս խմբակցութիւններուն, որպէսզի դադրեցուի անոնց զէնքերու եւ գումարներու հայթայթումը: Յատկապէս Թուրքիային, որ կը զինէ եւ կ'արտօնէ, նոյնիսկ հրահրելով, ազատ շրջագայութիւնը այս խմբակցութիւններուն, հակառակ իր կեղծ վստահեցումներուն հակառակին համար: Փաստերը ցայտուն են:
Յարգանքներով՝
Գասպար Կարապետեան
Նախագահ Եւրոպայի Հ.Յ.Դ. Հայ Դատի Յանձնախումբի