ՖՐԱՆՍԱՅԻ  ԾԵՐԱԿՈՅՏԻՆ  ՄԵԾԱՄԱՍՆՈՒԹԻՒՆԸ
ՀԱՄԱՁԱՅՆ  Է  ՑԵՂԱՍՊԱՆՈՒԹԵԱՆ ԲԱՆԱՁԵՒԻՆ


Ֆրանսայի Ծերակոյտի նախագահ Ժան Փիեռ Պել  Ուրբաթ, Յունուար 13ին յայտարարած է, որ թէեւ ինք շատ համաձայն չէ պատմական նիւթերով օրէնքներու, սակայն Ֆրանսայի ծերակուտականներուն մեծամասնութիւնը կ՛աջակցի Հայոց Ցեղասպանութեան ուրացումը քրէականացնող օրինագիծին:

22 Դեկտեմբեր 2011ին, Ֆրանսայի Ծերակոյտի մէջ
տեղի ունեցած քուէարկութեան պահուն


Ըստ Թուրքիոյ հանրային պատկերասփիւռի կայանին՝ Ֆրանսայի Ծերակոյտի նախագահը անհանգստութիւն յայտնած է օրինագիծի վաւերացման նկատմամբ, որովհետեւ այդ քայլը կրնայ վնաս հասցնել թուրք-ֆրանսական յարաբերութիւններուն:
Ֆրանսայի իշխող կուսակցութեան խորհրդարանական խմբակցութեան կողմէ պատրաստուած օրինագիծը կը վայելէ նաեւ գլխաւոր ընդդիմադիր՝ Ընկերվարական կուսակցութեան աջակցութիւնը: Կ՛ակնկալուի, որ անոր քննութիւնը սկսի Յունուար 23ին, իսկ քուէարկութիւնը՝ յաջորդ օրը:
Ծերակոյտի «Կանաչներ» կուսակցութեան  խմբակը յայտարարած է, թէ դէմ պիտի քուէարկէ օրինագիծին, որովհետեւ «քաղաքականութիւնը պէտք չէ նման հարցերու խառնուի», միաժամանակ շեշտելով, թէ իրենց խղճին համաձայն պիտի քուէարկեն իր անդամները: