«Երկիր Մետիա» կը հաղորդէ, որ հակառակ անոր որ հայկական կողմը պարբերաբար կը պնդէ, որ Հայոց ցեղասպանութեան հարցի ուսումնասիրութիւնը պատմաբաններուն յանձնելը Հայաստան-Թուրքիա արձանագրութիւններով նախատեսուած չէ, այդ արձանագրութիւններու կնքամայր երկիր Զուիցերիան պաշտօնական մակարդակով հանդէս եկած է պատմաբաններու կողմէ ուսումնասիրութիւններ կատարելու մասին յայտարարութեամբ:

Զուիցերիոյ արտաքին գործոց նախարար Միշլին Քալմի Ռէյ հայ եւ թուրք պատմաբաններուն կոչ ուղղած է ուսումնասիրելու, ըստ իրեն, «նախորդ դարու իրադարձութիւնները, որոնք երկու ժողովուրդներուն միջեւ լարուածութեան նախնական պատճառը դարձած են»: Քալմի Ռէյ, որ նաեւ Զուիցերիոյ համադաշնութեան նախագահն է, Անգարայի մէջ տեղի ունեցած թուրք դեսպաններու ընդհանուր ժողովին ընթացքին իր արտասանած խօսքին մէջ ըսած է, որ երկու կողմերու պատմաբանները պէտք է ուսումնասիրեն Հայոց ցեղասպանութեան պնդումները:
«Որմէ ետք պատմաբանները իրենց ուսումնասիրութիւններով երկխօսութեան մէջ ներդրում պիտի ունենան», ըսած է Քալմի Ռէյ:
Հազիւ մի քանի օր առաջ, 23 Դեկտեմբերին, Զուիցերիոյ խորհրդարանի արտաքին յարաբերութիւններու յանձնախումբը մերժած էր օրակարգ բերել Օսմանեան կայսրութեան կողմէ հայերու, ասորիներու, Պոնտոսի յոյներուն դէմ  ցեղասպանութիւնը ճանչցող բա-նաձեւը: