Յունական համացանցային եւ տպագիր մամուլը, երէկ ողողուեցաւ Ֆրանսայի խորհրդարանի որոշումին անդրադարձող գրութիւններով: Ազդեցիկ թերթեր ինչպէս «Թօ Վիմա», «Քաթիմերինի», «Նաֆթեմպորիքի», եւ համացանցային «Զուկլա», «in.gr» եւայլն լայն տեղ տրամադրեցին, նշելով քուէարկութեան պահը, թրքական հակազդեցութիւնները եւ պատմական վերլուծումներ կատարելով:

 

Թուրքիոյ վարչապետ Էրտողանի սպառնալիքները

«Թօ Վիմա» վերլուծելով հարցը կÿանդրադառնայ Թուրքիոյ վարչապետ Թայիփ Էրտողանի խօսքերուն, որ ամբաստանեց Ֆրանսայի նախագահ Նիքոլա Սարքոզին թէ «քաղաքականութիւն կը վարէ օգտագործելով ժողովուրդի այլատեցութեան զգացումները»:
Էրտողան հեռատեսիլէն ելոյթ ունենալով երէկ, ըսաւ թէ Թուրքիա կը սառեցնէ Ֆրանսայի հետ երկկողմանի իր բոլոր մշակութային եւ կրթական ծրագիրները, նոյնպէս զինուորական, քաղաքական եւ տնտեսական հանդիպումները: Վաւերացուած օրէնքին անդրադառնալով՝ ըսաւ թէ ցեղապաշտական եւ նախապաշարումներէ յառաջ եկած օրէնք մըն է, որ մեծ վէրքեր բացաւ Թուրքիոյ»:
Թուրքիոյ վարչապետը փութաց աւելցնելու թէ Ֆրանսայի դէմ գործադրուած հակազդեցութիւններու առաջին շարքն էր այն ինչ որ յայտարարուեցաւ, ապա Փարիզի կեցուածքը գնահատելով՝ Թուրքիա պիտի վերաքննարկէ հակազդեցութիւնները խստացնելու (կամ մեղմացնելու) քայլերը:
Ֆրանսական կողմը արդէն նկատի առած է թէ սպառնալիքները ուղղուած են իրենց մեծ ընկերութիւններուն հետ կապուած տնտեսական ճնշումներու, ինչպէս են օրինակ Airbusը, կամ Թուրքիոյ մէջ Carrefour եւ Total ընկերութիւնները:
Թուրքիոյ արտաքին գործոց նախարար Ահմետ Տաւութօղլու դիտել տուած է թէ օրէնքը կը խոչընդոտէ ազատ արտայայտութեան իրաւունքին, բայց ֆրանսացիները անմիջապէս կը հակադարձեն այս խօսքերուն, դիտել տալով թէ Անգարա երբեք չբողոքեց, երբ Ֆրանսա քրէական արարք նկատեց հրէական Հոլոքոսթի մերժումը:
Նշենք, որ 2001էն ի վեր, Ֆրանսայի նախագահ Ժագ Շիրաքի օրով, Ֆրանսայի Ծերակոյտը ճանչցած է Հայոց ցեղասպանութիւնը: Անկէ տաս տարիներ առաջ (1990ին) Ֆրանսա ճանչցած էր հրէական Հոլոքոսթը եւ քրէականացուցած էր մերժման պարագաները: