ՀՅԴ խմբակցութեան քարտուղար, ՀՅԴ ԳՄ փոխներկայացուցիչ Աղուան Վարդանեանը մեզ հետ զրոյցում պատասխանել է Երեւանի աւագանու ընտրութիւններում ընդդիմութեան տապալման պատճառների եւ հետագայ անելիքների մասին հարցերին:

 Պարոն Վարդանեան, աւագանու ընտրութիւններից առաջ տեւական ժամանակ՝ ընդդիմադիր ուժերով փորձում էիք միասնաբար հանդէս գալ, ինչը, սակայն, չստացուեց: Հիմա այդ նոյն ուժերը ընտրութիւնները դատապարտող յայտարարութիւններ են անում: Պարզ չէ՞ր, որ եթէ միաւորումը չստացուեց, այս պատկերն էր լինելու:

Դժուար է ասել՝ թերեւս պարզ էր, բայց գուցէ այդքան էլ յստակ չէր: Ակնյայտօրէն՝ եթէ նախընտրական միաւորում գոյանար, գուցէ պատկերը տարբեր կը լինէր: Եթէ մենք ունենայինք այնպիսի մթնոլորտ եւ ընտրութիւնների քաղաքական կարեւորութեան ընկալում, գուցէ մարդիկ էլ հաւատային փոփոխութիւններին: Կարող էր նաեւ հետընտրական դաշինքը նման ընկալման հնարաւորութիւն տալ: Փաստօրէն, երկուսն էլ չեղաւ:

Երբ միաւորումը տեղի չունեցաւ, նաեւ պարզ չէ՞ր, որ հետընտրական դաշինք էլ չի լինի, անիմաստ չէի՞ն այդ յայտարարութիւնները հետընտրական դաշինքի մասին:

Մենք իսկապէս անկեղծ ենք եղել: Դաշնակցութիւնը առաւելագոյնն արել է, որ նախընտրական դաշինքը հնարաւոր դառնայ, եւ եթէ դա չեղաւ, գոնէ հետընտրականի հիմքերը ստեղծուեն: Մենք մեզնից կախուածը արել ենք, փորձել ենք: Եթէ ընդդիմութիւնը գումարային մեծամասնութիւն ունենար, այն ուժը, որ չէր միաւորուի, քաղաքական դիակ կը դառնար: Մենք այսպէս էինք մտածում: Սա արդէն անցեալ է: Այն ինչ եղել է, եղել է:

Բայց՝ թերեւս աւելորդ չէ, քանի որ նման պատկեր եղաւ. ՀՀԿն կրկին իր մեթոդներով այդքան ձայն վերցրեց ու հիմա աւագանիում ընդդիմութիւնը ներկայացուած է միայն «Ժառանգութեան» ընդամէնը 7 մանդատով: Եւ հասկանալի է, որ այնտեղ ըստ էութեան, գրեթէ ոչինչ անել հնարաւոր չէ:

Ունենք այն, ինչ ունենք: Կայ ՀՀԿն՝ իր յայտնի մեթոդներով, կայ «Ժառանգութիւնը», կայ ԲՀԿն: Եթէ այս երկու ուժը աւագանիում անեն այն, ինչի մասին խօսում էին նախընտրական շրջանում, հետաքրքիր կը լինի, վատ չի լինի: Իհարկէ, որոշումները կը կայացուեն, բայց պայքար կը լինի եւ մարդիկ իրենց տեսակէտները կ՛արտայայտեն, բանավէճ կը լինի, նորմալ է: Թէեւ վստահ չեմ, որ այդպէս կը լինի: Վստահ չեմ նաեւ, որ երբ ամբողջ իշխանութիւնը վերեւից ներքեւ ՀՀԿն է, իրենց ամենաակտիւ գործունէութիւնը որեւէ արդիւնք կը տայ: Բայց կեանքը շարունակւում է եւ սա վերջը չէ, սա ընդհակառակը՝ սկիզբն է:

Պարոն Վարդանեան, հիմա ակնյայտ է, որ ունենք ահաւոր թոյլ վիճակում գտնուող ընդդիմութիւն: Կարո՞ղ էք ասել, ով է մեղաւոր դրա համար:

Ես սովոր եմ առաջինը ինձ մեղադրել, որ մենք չենք կարողացել մեր քաղաքացիների մօտ վստահութիւն եւ փոփոխութիւնների հնարաւորութիւն ներշնչել: Առաջին մեղաւորը մենք ենք: Այո, մենք գիտենք՝ ընտրութիւնները ինչպէս, ինչ մեթոդներով են կայացել: Բայց այսօր նոյնիսկ խնդիրն այդ չէ: Խնդիրը մենք ենք եւ մենք փորձելու ենք հասկանալ, թէ ինչ կարող էինք անել, որ չենք արել:

ՀՅԴն քանի՞ անդամ ունի:

Մօտ 5 հազար:

Այսինքն, ստացւում է, որ միայն ՀՅԴ անդամներն ու իրենց ընտանիքի անդամներն են ձեզ ձայն տուել, կողքից՝ չեն եղել: Դուք ասում էք, որ նաեւ դուք էք մեղաւոր այդ ամէնի համար, աւելի յստակ կարո՞ղ էք ասել՝ որն է ձեր մեղքը:

Մենք չենք կարողացել մարդկանց մէջ փոխել հոգեբանութիւնը, մտածողութիւնը, որ առաջինը մեզանից պիտի սկսէինք: Մեծ հաշուով՝ մենք չենք կարողացել մարդկանց համոզել, որ իշխանութիւնները յաւերժ չեն, որ փողը թուղթ է, որ վախը, մարդկանց ճնշելը, վախով քուէարկելը լաւ տեղ չի տանելու: Չենք յաջողել: Հիմա հետեւութիւններ պիտի անենք:

Այդ վախը 2008ին էլ կար, յետոյ էլ կար, բայց տեսանք, որ մարդիկ գնացին ու քուէարկեցին ընդդիմութեան օգտին:

2013ին էլ քուէարկեցին: Բայց ընդամէնը երկու ամիս յետոյ նորից պետական ամբողջ համակարգը վերածուեց ընտրական համակարգի եւ տոտալ (համատարած)՝ ընտրակաշառք: Մենք թէժ գիծ ստեղծեցինք, բոլոր ահազանգերը փոխանցեցինք ոստիկանութիւն: Ահազանգերը տարբեր բնոյթի էին՝ օրինակ, Չարենցի փողոցում պայմանական ասած, Կիրակոսը, որը յայտնի է այդ թաղամասում, ընտրակաշառք է բաժանում, Էրեբունիում այսինչ շէնքում համատիրութեան նախագահ այսինչը ընտրակաշառք է բաժանում: Նոյնը օրը լրագրողները վարչապետին ահազանգել էին՝ ՀՀԿականները ընտրակաշառք են բաժանում: Վարչապետն ասել էր՝ հերիւրանքներ են: Վստահ եմ՝ եթէ Չարենցի փողոցի պայմանական Կիրակոսին եւ Էրեբունի թաղամասի պայմանական Բաղդասարին ոստիկանութիւնը հարցնի, նրանք էլ են ասելու՝ հերիւրանքներ են: Այսինքն, նոյնն են ասելու, ինչ վարչապետը: Նորմալ է, մեր աննորմալ իրականութիւնն է:

Հիմա ի՞նչ է անելու ընդդիմութիւնը՝ մինչեւ յաջորդ ընտրութիւններ:

Յաջորդ ընտրութիւնները մի քանի տարի յետոյ են: Մենք ունենք անելիք մեր ներսում՝ առաջին հերթին մեր խնդիրները հասկանալու, մեր առջեւ դրուած խնդիրները լուծելու առումով: Ասացի արդէն, միանձնեայ իշխանութիւն կայ, թող աշխատեն, արդիւնքներին կը հետեւենք: Մենք զբաղուելու ենք առաջին հերթին մեզանով, փորձելու ենք ակտիւ, գիտակից, մտաւորական, լուրջ մարդկանց մտքի եւ աշխատանքի դաշտ ստեղծել:

Հարցազրոյցը վարեց՝ ԼՈՒՍԻՆԷ ԲԱՐՍԵՂԵԱՆ
armtimes.am