Ինչպէ՞ս էք գնահատում քարոզարշաւի ընթացքը:
Բաւականին համահունչ քարոզարշաւի պահանջներին: Դուք գիտէք, որ մեր երկրի նուաճումների շարքին է դասւում այդ քաղաքական մշակոյթի առկայութիւնը մեր կեանքում:
Եւ այդ նախկին ժամանակաշրջանից կուտակուած փորձը միանշանակ նպաստում է, որ այս քարոզարշաւը լինի կազմակերպուած, եւ կարծում եմ, որ բոլոր նրանք, ովքեր մասնակցում են քարոզարշաւին, հետեւում են, կարող են փաստել, որ քարոզարշաւն անցնում է բաւականին քաղաքակիրթ պայմաններում, եւ մենք շահագրգռուած ենք, որ այս ընտրութիւնները շարունակութիւնը լինեն մեր նախկին ընտրութիւնների՝ այդ քաղաքական մշակոյթի զարգացման ուղղութեամբ: Ես հնարաւորութիւն եմ ունեցել մինչ քարոզարշաւը կոչ ուղղելու, պահանջներ ներկայացնելու, ինչպէս նաեւ խնդրելու նրանց, ովքեր պատասխանատուութիւն են կրում ընտրութիւնները կազմակերպելու եւ անցկացնելու համար, որ այս ընտրարշաւը եւ ընտրութիւնները լինեն մեր ընտրական յաղթական երեւոյթների շարունակութիւնը:
Ձեր մրցակիցը բաւականին սուր քննադատում է թէ՛ ձեզ, թէ՛ ձեր թիմին, եւ թէ անցած տարիների ձեր գործունէութեանը: Ինչպէ՞ս էք վերաբերում այդ քննադատութիւններին:
Ընդդիմութիւնը թէ՛ Արցախում, թէ՛ աշխարհում հիմնականում իր գործունէութիւնը կառուցում է քննադատութիւնների վրայ: Եւ քանի որ այս տարիների ընթացքում մենք բազմիցս նշել ենք, որ ինչպէս եւ միւս քաղաքակիրթ երկրները, Արցախը նոյնպէս ունի ընդդիմութեան անհրաժեշտութիւն, եւ միայն կարելի է ողջունել, որ ընդդիմութիւնը գործում է Արցախում: Եւ գտնում եմ, որ դա լաւագոյն քաղաքակիրթ միջոցներից է, որպէսզի իշխանութիւնը իր պարտականութիւնները կատարի աւելի արդիւնաւէտ, որպէսզի իշխանութիւնները լինեն զգաստ, եւ այդ տեսակէտից, իհարկէ, կարեւորում եմ ընդդիմութեան գործունէութիւնը: Ես դէմ եմ եղել ձեւական ընդդիմութեան ձեւաւորմանը, որովհետեւ դա կը լինէր ժողովրդավարական սկըզբունքների խախտման ամենակոպիտ ձեւը: Եւ իմ իսկ հնարաւորութեան սահմաններում, իմ գործընկերների հետ միասին պատրաստ եմ ամէն ինչ անել, որպէսզի ընդդիմութիւնը կարողանայ իրականացնել իր բնականոն գործունէութիւնը: Ինչ վերաբերում է այդ սուր քննադատութիւններին, ես կողմնակից եմ, որ այդ քննադատութիւնները լինեն հիմնաւորուած, որովհետեւ երբ մենք խօսում ենք իշխանութեան պարտականութիւնների մասին, այդ նոյն պարտականութիւններն ունի նաեւ ընդդիմութիւնը, եւ ցանկալի է, որ Արցախում ընդդիմութիւնը ձեւաւորուի այդ նոյն քաղաքական մշակոյթի պահանջների համապատասխան: Եւ սա կը լինի մեր հերթական արձանագրած յաջողութիւնը մեր կեանքում:
Արխիւի լուսանկար ԼՂՀ նախագահ Բակօ Սահակեանի եւ Արցախի առաջնորդ
Պարգեւ արք. Մարտիրոսեանի պատուիրակութեան այցելութենէն Աթէնք, 12 Փետրուար 2012ին
Պարոն նախագահ, բաւականին ծանրաբեռնուած գրաֆիկ (ժամանակացոյց) ունէք, գրեթէ ամէն օր լինում էք գիւղական վայրերում, հանգստանալու ժամանակ ունենո՞ւմ էք:
Նախընտրական քարոզարշաւի աշխատանքները տարբերւում են իմ առօրեայի աշխատանքներից, բայց ոչ շատ: Մենք վաղուց արդէն աշխատում ենք գրեթէ նոյն առօրեայի, աշխատանքային այդ օրակարգի պահանջներին համապատասխան: Մենք ունեցել ենք գրեթէ երկու հարիւր հանդիպում այս քարոզարշաւի ընթացքում, եւ քանի որ կարեւորում եմ նման հանդիպումները, եւ նախորդ տարիներին ընթացքում միշտ գերադասել եմ կենդանի կապը, եւ պատճառներից մէկն էլ դա էր, որ յաճախակի էի հանդիպում մեր քաղաքացիների հետ յատկապէս գիւղական վայրերում: Եւ միշտ նշել եմ, որ այդ աշխատաոճը բաւականին արդիւնաւէտ է, եւ քարոզարշաւը ունի մեր կեանքի այն երեւոյթները բացայայտելու հնարաւորութիւնները, որոնք առօրեայ պայմաններում շատ դէպքերում հնարաւոր չի լինում: Իսկ հանգստանալու համար ժամանակ գտնում եմ, իհարկէ, քիչ, որպէսզի այդ ժամանակը տրամադրեմ իմ ընտանիքի անդամներին, եթէ յաջողւում է՝ նաեւ իմ ընկերներին:
Պարոն նախագահ, գաղտնիք չէ, որ Ղարաբաղում դեռ եւս բազմաթիւ չլուծուած խնդիրներ կան, առկայ է սոցիալական լար- ւածութիւն, դրան զուգահեռ, սակայն, կառավարութիւնը վերջին հինգ տարիներին ձեռք է բերում բաւականին թանկարժէք շքեղ ծառայողական մեքենաներ, պետական պաշտօնեաների կեանքն էլ գնալով է՛լ աւելի է բարելաւում. ինչպէ՞ս էք մեկնաբանում այս ամէնը:
Իշխանութեան ներկայացուցիչները, կառավարութիւնը մեր քաղաքացիների մի մասն են, եւ եթէ նրանք այդ ամէնին հասնում են իրենց քրտնաջան աշխատանքի շնորհիւ՝ միայն կարելի է ողջունել: Ես դէմ եմ, որպէսզի իշխանութեան ներկայացուցիչները իրենց իշխանութեան լծակները օգտագործեն եւ նման եղանակներով հասնեն այս կամ այն յաջողութիւնների: Եթէ դա արդիւնք է նրանց կողմից կատարուած աշխատանքի, այդ թւում եւ՝ բիզնեսը, նրանց ընտանիքի անդամների ներգրաւուածութիւնն է բիզնես աշխարհում ստեղծում այդ բարիքները՝ ես ոչ թէ քննադատում եմ, այլ ողջունում եմ: Ինչ վերաբերում է այդ տարբերութեանը իշխանութեան ներկայացուցիչների եւ քաղաքացիների, ինչպէս դուք էք նշում՝ այդ ճոխ մեքենաների, ես չեմ կիսում այդ կարծիքը, որովհետեւ այդ հնարաւորութիւնները ստեղծւում են մեր կողմից գիտակցուած, որովհետեւ իշխանութիւնների ներկայացուցիչները իրենց պարտականութիւնների՝ բարձր մակարդակով կատարման համար պիտի յագեցուած լինեն անհրաժեշտ այդ ներուժով: Եւ ես չեմ գտնում, որ եթէ իշխանութեան ներկայացուցիչը այսօր իր գործունէութիւնը իրականացնում է, ինչպէս ընդունուած է ասել՝ «ջիփ մակնիշի» մեքենայով, դա շքեղութիւն է: Որովհետեւ այդ մեքենաները ձեռք բերելուց մենք մի քանի մասնագիտական եզրակացութիւններ ենք իրականացրել, որի համաձայն պարզուել է, որ թէ՛ պահպանման ծախսերը այդ մեքենաների՝ նախկինների համեմատ, մի քանի անգամ աւելի խնայողականութիւն են ապահովում մեզ համար, քան եթէ մենք, ասենք, ռուսական կամ այլ երկրների մեքենաներ օգտագործէինք մեր ծառայողական պարտականութիւնները կատարելու համար: Եւ այսօրուայ իշխանութեան ներկայացուցչի պարտականութիւնները պահանջում են նաեւ արագաշարժ եւ արագ գործունէութեան հնարաւորութիւն, եւ եթէ այդ մեքենաները նպաստում են այդ աշխատանքները կատարելու որակով եւ մակարդակով, ես չեմ համարում, որ դա շքեղութիւն է. դա ուղղակի ծառայողական պահանջ է՝ ուրիշ ոչ մի բան:
Ձեր յայտարարագիրը, որ դուք ներկայացրել էք Կենտրոնական ընտրական յանձնաժողով, եւս քննարկման թեմա է դարձել: Այնտեղ դուք նշել էիք, որ ունէք ընդամէնը մէկ առանձնատուն, եւ նշել էիք ձեր դրամական եկամուտները: Փաստօրէն, այն, որ ժողովրդի մէջ է շրջանառւում՝ որ «Ռոսիա» ռեստորանը եւ որոշ տաքսի սերվիսներ ձերն են, դա թիւրիմացութի՞ւն է, դուք առնչութիւն չունէ՞ք:
Գիտէք, ոչ միայն «Ռոսիա» համալիրը, ոչ միայն այդ տաքսի սերվիսը՝ ես անձամբ միջամտել եւ միջամտում եմ բազմաթիւ ծրագրերի կեանքի կոչելուն, այդ թւում նաեւ «Ռոսիա» համալիրը իմ անմիջական մասնակցութեամբ է կառուցուել, եւ այսօր էլ շարունակում եմ մասնակցութիւն ունենալ բազմաթիւ նմանատիպ ծրագրերի իրականացմանը: Ես կ՛ուզենայի, որպէսզի իմ մասնակցութիւնը, այդ թւում նաեւ այդպիսի կառոյցների ստեղծման, կառուցման գործում, լինէր աւելի շատ, որովհետեւ դրանից շահում են մեր քաղաքացիները, մեր երկիրը ունի այդպիսի պահանջներ: Այդ նոյն յաջողութեամբ կարելի է ասել, որ ես օդանաւակայանի կամ հիւանդանոցի կամ ճանապարհաշինարարութեան այդ նոյն հատուածների կամ այդ նոյն բիզնեսների սեփականատէրն եմ: Ես գիտեմ այդ քննարկումների մասին, գիտեմ այդ գնահատականների մասին, դա մեր կենցաղի մի մասն է, եւ փորձում եմ հանգիստ վերաբերուել այդ ամէնին եւ շարունակել իմ որոնումները՝ լրացուցիչ միջոցներ հայթայթելու, մէկ այլ կառոյց կառուցելու, մէկ այլ նուէր մատուցելու մեր երկրին: Եւ ինչքան շատ է յաջողւում ինձ նմանատիպ աշխատանքներ կատարելու՝ այնքան էլ ինձ բաւարարուած եմ զգում:
Պարոն նախագահ, ընտրուելու դէպքում արդեօ՞ք համագործակցելու էք ձեր մրցակիցների հետ:
Ես կարծում եմ՝ դա լրացուցիչ մեկնաբանութեան անհրաժեշտութիւն չունի, որովհետեւ մեր նախորդ տարիների գործունէութիւնը լաւագոյն ապացոյցն է, որ մեր նպատակն է ոչ թէ աւելորդ լարուածութիւն սերմանելու մեր երկրում, այլ՝ ամէն կերպ նպաստելու մեր երկրի բարոյահոգեբանական մթնոլորտի ձեւաւորմանը: Եւ ես իմ հանդիպումների ժամանակ քանիցս նշել եմ՝ մեր քաղաքացիների հետ այդ հանդիպումների ժամանակ, որ յարգում եմ այն բարոյահոգեբանական մթնոլորտը, որը ձեւաւոր-ւել է մեր երկրում, եւ մեր տնտեսութեան զարգացման գործում, մեր հասարակական կեանքի ձեւաւորման, մեր երկրի անվտանգութեան համակարգի ապահովման համար անհրաժեշտ պայման է նաեւ այդ ստեղծուած բարոյահոգեբանական մթնոլորտը եւ այն համերաշխութեան աստիճանը, որը տեղ է գտել մեր կեանքում: Ես կողմնակից եմ այդ ձեռքբերումները է՛լ աւելի զարգացնելու նպատակ հետապնդելու, որ դա նոյնպէս միջոց է մեր հիմնախնդիրներին լուծում տալու, ինչպէս նաեւ մեր երկիրը աւելի արագ տեմպերով զարգացնելու: