Հայաստանի զանազան գիւղերուն մէջ կատարուած քննութենէ մը ի յայտ եկած է որ հետեւեալ պատկերը կը ներկայացնեն մանկամսուրները
- Նոյեմբերեանի, Բասարգեչարի, Թալինի, Կրասնոսելսկի շրջաններու գիւղերուն մէջ մանկամսուրներ չկան, ոչ ալ մանկապարտէզներ, որով մայրերը ստիպուած իրենց հետ դաշտ կը տանին իրենց երեխաները։ Արեւիկ, Սովետական, Ջրաշէն գիւղերու մանկապարտէզները տեղաւորուած են խոնաւ, փոշիոտ հիւղակներու մէջ։ Շիրագլու գիւղի մսուր-մանկապարտէզը 30-40 երեխայի համար ունի ընդամէնը 10 կոտրած մահճակալ։ Առողջապահական նախարարութիւնը փակած է հակառողջապահական պայմաններու տակ գտնուող Էջմիածնի շրջանի Ծաղկունք, Դեմրչի, Աղջաղալա գիւղերուն մանկապարտէզները։ Քննիչները՝ «Սով. Հայաստան»ի խմբագրութեան մաս կազմող պատասխանատու մը եւ առողջապահութեան նախարարութեան երեխաներու եւ մայրերու օգնութեան բաժնին պետը՝ Տ. Բունիաթեան, տեսած են նաեւ անմխիթար վիճակ պարզող բազմաթիւ մսուր-մանկապարտէզներ, ուր «քսան երեխային յատկացւում է հինգ սրբիչ։ Ասենք դրա կարիքն էլ չկայ, որովհետեւ նրանք երբեք չեն լուացւում»։ «Գետնափոր, խոնաւ, փոքրիկ պատուհաններով սենեակում 20 երեխայի համար դրուած են երկու ջարդուած մահճակալներ՝ առանց անկողինների, ոչ մի գոյք, ոչ մի ափսէ, դգալ, ոչ մի աթոռ, սեղան, ջուրն անգամ ծնողքներն են տնից բերում, եւայլն։ Իբրեւ եզրակացութիւն կը մեղադրեն Հայաստանի առեւտուրի նախարարութիւնը, որ պետութեան հաստատած ֆոնտերը «չեն բաշխում քաղաքներին ու շրջաններին, այլ հիմնականում տալիս են Երեւանին, քիչ քանակութեամբ էլ՝ Լենինականին»։ Միեւնոյն ատեն, «Հայաստանի մէջ վատ հիմքերի վրայ է դրուած մանկահասակ երեխաների սննդի կազմակերպումը»։
Հայկական աշխարհագրական ընկերութեան նախաձեռնութեամբ Երեւանի մէջ գիտական խորհրդակցութիւն մը տեղի ունեցած է՝ լեռնային երկիրներու ջրօդերեւութաբանութեան հարցերուն նուիրուած։