- Անցեալին՝ փոքրիկ տնակներով ծուռ ու մուռ, կեղտոտ փողոցներով գիւղ մըն էր Ղարաքիլիսան։ Ներկայիս, Սիսիան անունին տակ դարձած է գեղեցիկ աւան մը։ Դպրոցականներու թիւը կþանցնի երկու հազար չորս հարիւրը։ Կան մանկապարտէզ, նախակրթարան, երաժշտանոց, ինչպէս նաեւ հիւանդանոց, մշակոյթի տուն եւ, անշուշտ, արհեստանոցներ։ Տարիներու ընթացքին Սիսիան պիտի դառնայ Հայաստանի կարեւոր քաղաքներէն մէկը։

- Երեւանի «Լոյս» հրատարակչականը դպրոցական տարեմուտին առթիւ հրապարակ հանած է հարիւր տեսակ դասագիրքեր՝ չորս միլիոն օրինակ ընդհանուր տպաքանակով։ Մանկապարտէզներու համար հրատարակած է բազմագոյն այբբենարան մը։ Հայաստանի աշակերտութեան ընդհանուր թիւը կէս միլիոնի կը հասնի։

- Էջմիածնի Կաթողիկոսը՝, Վեհ. Վազգէն Ա. Վենետիկի Մխիթարեան վանքին նուիրած էր սեւ կրանիթէ խաչքար մը, փայլուն մարմարով շրջանակուած, զարդաքանդակուած՝ արմաւենիի ճիւղերով։ Խաչքարը զետեղուած է եկեղեցւոյ գաւիթին մէջ։ Հանդիսաւոր Ս. Պատարագէն ետք, որ մատուցուած է ի յուշ Ապրիլեան նահատակներուն, բացումը կատարուած է Խաչքարին, ի ներկայութեան վանական հայրերու եւ ազգայիններու։ Խօսած է Հայր Վահան Վրդ. Յովհաննէսեան, որ ըսած է.- «Խաչքարը եկած է Հայաստանէն, վերստին պատկերացնելու համար մեր դարաւոր պատմութիւնը։ Խաչը եղած է մեր արքաներուն թագին զարդը, մեր զինուորականներու կուրծքին շքանշանը, դէպի երկինք թռչող մեր եկեղեցիներուն սլաքը։ Անոր շուքին տակ, շարունակ պաշտպաներ ենք մեր անունը, մեր հաւատքն ու մշակոյթը։ Ո՞վ կարող է խլել մեզմէ՝ այս փառքը»։

- «Հայաստան» հրատարակչութիւնը լոյս ընծայեց Մատթէոս Զարիֆեանի գործերու հաւաքածոն: Առաջին անգամ է, որ Հայաստանի մէջ հրապարակ կþելլէ վաղամեռիկ բանաստեղծին քերթուածներու հաւաքածոն: