Երէկ Հայաստանի Ազգային ժողովի չորս ոչ իշխանական ուժերը հրապարակեցին իշխանութիւններէն իրենց ունեցած 12 պահանջները:
Ստորեւ յայտարարութիւնը:
Հայաստանի Ազգային ժողովի ՀՅԴ, Բարգաւաճ Հայաստան կուսակցութիւն, «Ժառանգութիւն», Հայ ազգային քոնկրես խմբակցութիւնները հաստատում են Հայաստանում հիմնարար փոփոխութիւններ կատարելու, քաղաքական եւ տնտեսական համակարգը առողջացնելու, Հայաստանը զարգացման ուղու վրայ դնելու համատեղ ջանքերի գործադրման վճռականութիւնը:
Քառեակում ընդգրկուած ուժերը յայտարարում են՝ Հայաստանի ինքնիշխանութիւնը, Լեռնային Ղարաբաղի Հանրապետութեան անկախութիւնը, անվտանգութեան ապահովումը, հիմնահարցի խաղաղ եւ արդարացի կարգաւորումը գերակայ սկզբունքներ են: Այս հարցերում անթոյլատրելի է որեւէ նահանջ, իսկ ընդունուելիք որոշումները պէտք է լինեն բացառապէս հանրութեան եւ խորհրդարանի մասնակցութեամբ:
Քառեակը արձանագրում է, որ համատեղ նախաձեռնութիւնները, հանրային միջոցառումները արդէն իսկ արդիւնքներ են տուել: Ազգային ժողովը իշխանութեան եւ ընդդիմութեան միջեւ հանրային ու քաղաքական լուրջ քննարկումների հարթակ է դարձել: Էական քայլեր են կատարուել կենսաթոշակների մասին օրէնքում պարտադիր բաղադրիչի վերացման ուղղութեամբ: Արդիւնաւորուել են նախկին կառավարութեանը անվստահութիւն յայտնելուն ուղղուած համատեղ ջանքերը: Միեւնոյն ժամանակ իշխանութեան քայլերը եւ նոր կառավարութեան ծրագիրը համարժէք չեն ժողովրդի պահանջներին, երկրի առջեւ ծառացած մարտահրաւէրներին:
Ստեղծուած իրավիճակում քառեակը համոզուած է, որ արտագաղթը եւ տնտեսական անկումը կասեցնելու, սեփական պետութեան նկատմամբ ժողովրդի վստահութիւնը վերականգնելու, հիմնարար փոփոխութիւնների գործընթաց սկսելու նպատակով անհրաժեշտ են անյապաղ միջոցառումներ:
Ելնելով վերոյիշեալից՝ քառեակը իշխանութիւններին ներկայացնում է հետեւեալ առաջնահերթ պահանջները՝ ակնկալելով, որ դրանք պէտք է կատարուեն մինչեւ 2014 թուականի Սեպտեմբերի վերջը.
1. Վերացնել պարտադիր կուտակային բաղադրիչը, աշխատավարձերից կատարուած պահումները վերադարձնել քաղաքացիներին: Ամբողջութեամբ կատարել Սահմանադրական դատարանի 2014 թուականի Ապրիլի 2-ի որոշումը: Նոր համակարգը ձեւաւորել հասարակութեան շերտերի ընդգրկման եւ կամաւոր կուտակային բաղադրիչը խթանելու սկզբունքներով:
2. Վերանայել տեսանկարահանող եւ լուսանկարող սարքերի, կարմիր գծերի գործող համակարգերը, դրանց կիրառման արդիւնքում պետական եւ համայնքային պիւտճէի մուտքերի տեսակարար կշիռը հասցնել առնուազն 75 տոկոսի, սահմանել, որ տուգանքների եւ վճարների առաւելագոյն չափերը չեն կարող գերազանցել նուազագոյն ամսական աշխատավարձի 10 տոկոսը:
3. Առնուազն երեք անգամ նուազեցնել շրջանառութեան հարկի դրոյքաչափերը: Շրջանառութեան առաւելագոյն շեմը 58,35 միլիոն դրամից դարձնել 150 միլիոն դրամ, արտօնագրային վճարների գծով սահմանուած 9 միլիոն դրամը՝ 15 միլիոն դրամ: Հանել սահմանի վրայ աւելացուած հարկի գանձումը:
4. Առնուազն կրկնապատկել գիւղմթերքների արտադրութեան, ոռոգման ջրի եւ վարկերի համար տրամադրուող օժանդակութիւնների ծաւալները: Սահմանել յստակ մեքանիզմ օժանդակութիւնների միաւորման, դրանք ագարակային եւ գիւղացիական տնտեսութիւններին տրամադրելու, ոռոգման ջրի օգտագործման դիմաց վճարումներ կատարելու համար:
5. Գիւղատնտեսութիւնում տրուած արտարժութային վարկերը վերածել դրամայինի: Դրամատներից ձեռքբերել 2014 թուականի Յունիսի 1-ի դրութեամբ մինչեւ 3 միլիոն դրամի վարկային ժամկէտանց պարտաւորութիւնները, դրանց նկատմամբ սահմանել մարման 5-ամեայ ժամկէտ՝ առանց տոկոսագումարների հաշ- ւարկման: 3 միլիոն դրամից աւելի գիւղատնտեսական վարկային պարտաւորութիւնները վերաձեւակերպել նոր վարկերի՝ 5 տարի մարման ժամկէտով, տարեկան առաւելագոյնը 8 տոկոսով:
6. Հաստատել «Նայիրիտ գործարան» ընկերութեան վերագործարկման ծրագիրը, վճարել աշխատավարձի գծով աշխատակիցների նկատմամբ կուտակուած պարտքը: Ձեւաւորել «Նայիրիտ»-ի անցած տարիների գործունէութիւնն ուսումնասիրող խորհրդարանական ժամանակաւոր յանձնաժողով:
7. Բացառել «Որոտան ջրելեկտրակայանների համալիր» փակ բաժնետիրական ընկերութեան գոյքի վաճառքը (մասնաւորեցումը) առանց ԱԺի հաւանութեան:
8. Գործող փոխադրական համակարգում բացառել հանրային փոխադրամիջոցների փոխադրավարձերի բարձրացումը: Հաստատել մատչելի, անվտանգ ու որակեալ հանրային փոխադրութեան համակարգ:
9. Ընդունել ձեւաւորուած փաստացի տնտեսական մենաշնորհները վերացնելու եւ ազատ տնտեսական գործունէութիւն երաշխաւորելու մեքանիզմներ ներառող օրէնսդրական փաթեթ:
10. Ընտրական օրէնսգրքում կատարել փոփոխութիւններ, որոնցով Ազգային ժողովի յաջորդ ընտրութիւնները կ՛անցկացուեն 100 տոկոս համամասնական ընտրակարգով, ինչպէս նաեւ ընտրութիւնների աւարտից անմիջապէս յետոյ ընտրութիւններին մասնակցած ընտրողների ստորագրուած ցուցակները կը հրապարակուեն ընտրատեղամասերում եւ երկու օրուայ մէջ, ըստ տեղամասերի որոնման եւ ներբեռման հնարաւորութեամբ, կը տեղադրուեն Կենտրոնական ընտրական յանձնաժողովի պաշտօնական կայքէջում:
11. Ապահովել ընդդիմութեան մասին օրէնսդրական փաթեթի ընդունումը՝ ընդդիմութեանը օժտելով վերահսկողութեան գործառոյթներով:
12. Չստորագրել որեւէ միջազգային համաձայնագիր, որով Հայաստանի եւ Լեռնային Ղարաբաղի Հանրապետութեան միջեւ կը նախատեսուի հաստատուած յարաբերութիւնների, ներառեալ միասնական տնտեսական դրութեան փոփոխութիւն: Գիտակցելով, որ հիմնարար փոփոխութիւնների միակ երաշխաւորը ժողովուրդն է, քառեակը աշնանը, Ազատութեան հրապարակում, կը հրաւիրի Հայաստանի քաղաքացիների համապետական հանրահաւաք, որտեղ կ՛ամփոփուի պահանջների կատարումը եւ կ՛որոշուեն հետագայ համատեղ գործողութիւնները: