ԳԵՂԱՐՔՈՒՆԻՔ, «Նիուզ».- Սեւանայ լիճի մերձակայ 92 շրջաններուն մէջ կը գործեն պաշտօնական 27աղբավայրեր, ինչպէս նաեւ՝ տարերայնօրէն ձեւաւորուած եւ չհսկուող բազմաթիւ այլ աղբավայրեր:
ՀՀ քաղաքաշինութեան նախարարութեան տուեալներով, այդ աղբավայրերը չեն համապատասխաներ բնապահպանական եւ մաքրութեան չափանիշներուն. ջուրը, հողն ու օդը աղտոտող աղբիւրներ են, Սեւանայ լիճի աւազանի տարածքին կը յառաջացնեն բնապահպանական եւ առողջապահական լուրջ խնդիրներ եւ կը խոչընդոտեն Սեւանի բնապահպանական գործին:
Անհամեմատ աւելցած է լիճ թափուող կենսածին (ազոտ, ֆոսֆոր…) եւ «թոքսիք» նիւթերու քանակը, ու լուրջ փոփոխութիւններ տեղի ունեցած են Սեւանայ լիճ թափուող գետերուն մէջ:
Գոյութիւն ունեցող աղբավայրերու տեղադրման ժամանակ նկատի չեն առնուած քաղաքաշինական բազմաթիւ սահմանափակումներ (մակերեւութային ջուրերու հոսք, հեղեղաբեր գետակներ, արգելոցային հատուածներ գետերու ներքին հոսանքներու մէջ, կոյուղիի մաքրման կայաններու բացակայութիւն, առողջարաններու եւ հանգստեան տուներու առկայութիւն եւ այլն): Հաշուի չեն առնուած նաեւ ուժեղ քամիները, որոնք աղբը կը տարածեն՝ գրաւելով աւելի մեծ տարածքներ: Ոչ մէկ աղբավայր ցանկապատուած է: Ընտրուած տարածքներուն չափերը նոյնպէս չեն համապատասխաներ պէտք եղած չափանիշներուն։
Բնապահպանական աղէտը կանխելու նպատակով, քաղաքաշինութեան նախարարութիւնը կառավարութեան քննարկման ներկայացուցած է Սեւանայ լիճի մերձակայ տարածքի աղբավայրերու տեղադրման նոր ուրուագիծ, որուն համաձայն, պիտի մնայ միայն հինգ աղբավայր:
Սեւանի խորհրդանիշը կարող է դառնալ գորտը՝ փոխարինելով իշխան եւ սիգ ձկնատեսակները
PanARMENIAN.Net - Սեւանայ լիճին լուրջ տնտեսական եւ էկոլոգիական վնաս կը հասցուի, «Կոռուպցիան մեր ազգի թշնամին է» նիւթով քննարկման ժամանակ յայտարարեց «Իրաւական պետութիւն» քաղաքացիական նախաձեռնութեան համակարգող Անդրէեաս Ղուկասեանը: Բարձրացնելով լիճի ջուրի մակարդակը` անհրաժեշտ է մաքրման աշխատանքներ իրականացնել, այլապէս Սեւանին ճահճացում կը սպառնայ: Անդրէաս Ղուկասեանը նշեց, որ եթէ մի քանի տարի առաջ Սեւանի խորհրդանիշը իշխան եւ սիգ ձկնատեսակներն էին, իսկ Սեւանի խեցգետինները յայտնի էին նաեւ Հայաստանի սահմաններէն դուրս, ապա մօտ ապագային Սեւանի խորհրդանիշը կարող է դառնալ գորտը:
Ի պատասխան այդ յայտարարութիւններուն, Հայաստանի բնապահպանութեան նախարարութեան ներկայացուցիչները նշեցին, որ այս տարի եւս Սեւանի եւ առափնեայ տարածքներու մաքրման աշխատանքները կը շարունակուին ժամանակակից արհեստագիտութեան կիրառմամբ:
2011 թուականին կը ծրագրուի անտառէն մաքրել Սեւանայ լիճի 283,3 հեկտար առափնեայ տարածք: 2010 թուականին մաքրուած է 174 հա առափնեայ տարածք, որմէ 167,3 հա՝‘ ամբողջութեամբ, իսկ մնացած 6,7 հա մաքրումը տեղափոխուած է 2011 թուականի ծրագրին մէջ: Այս տարի Սեւանայ լիճի ռեկրեացիոն գօտիին մէջ կը ստեղծուին երկու հասարակական անվճար լողափեր, որպէսզի հանրապետութեան քաղաքացիները կարողանան լճափին անվճար օգտուիլ հանգստեան ծառայութիւններէն: Այս նպատակով կառավարութիւնը 62 մլն դրամ յատկացուցած է շինարարական եւ 4 մլն դրամ՝ նախագծային աշխատանքներու համար: