Ատրպէյճան 10 Յունուարի ամբողջ օրուան ընթացքին հայ-ատրպէյճանական սահմանի տարբեր հատուածներուն վրայ խախտած է հրադադարի կանոնները՝ կրակ արձակելով հայկական մարտական դիրքերու եւ բնակավայրերու ուղղութեամբ:
Այս մասին, ըստ Aysor.am-ի, յայտնած է Հայաստանի պաշտպանութեան նախարարի մամլոյ բանբեր Արծրուն Յովհաննիսեանը:
Ան նշած է, որ կրակահերթերը առաւել աշխուժ եղած են երեկոյեան ժամերուն, սակայն հայկական կողմի պատասխան գործողութիւններուն իբրեւ արդիւնք կարելի եղած է լռեցնել հակառակորդը:
Հակառակորդը իր գործողութիւնները իրականացուցած է տարբեր տեսակի զինատեսակներով:
Ա. Յովհաննիսեանի հաստատումով՝ հայկական կողմը կորուստներ ու վիրաւորներ չունի:
ԱԳ նախարարի
տեղակալ Շաւարշ Քոչարեանի պատասխանը՝ Իլհամ Ալիեւի պնդումներուն
«Արմէնփրէս» լրատու գործակալութիւնը հարցում ուղղած է արտաքին գործոց նախարարի տեղակալ Շաւարշ Քոչարեանին, թէ ինչպէ՞ս կը մեկնաբանէ ազերի նախագահի այն պնդումները, թէ համաձայն թիւերու՝ Հայաստան կը զիջի Ատրպէյճանին բոլոր բնագաւառներէն ներս:
Ան ըսած է. «Վաղուց ոչ մէկի համար գաղտնիք չէ, որ բանակցային գործընթացի հիմնական խոչընդոտն է Ատրպէյճանի կողմից խնդրի էութեան նենգափոխմամբ ինքնորոշման իրաւունքի ժխտումը, հայատեաց քարոզչութիւնը եւ պատերազմի վերսկսման սպառնալիքները: Սա հերթական անգամ արտայայտուեց Ատրպէյճանի նախագահի վերջին ելոյթում: Նա կարող էր էլ աւելի տպաւորիչ թիւեր հնչեցնել՝ համեմատուելով Արցախի Հանրապետութեան: Սակայն նա խուսափում է դրանից, քանի որ չի մոռացել Արցախից կրած պարտութեան մասին»: