Նոյն հարցով, ՀՀ Սփիւռքի նախարարուհի Հրանուշ Յակոբեան կոչ ուղղած է հայութեան՝ դատապարտելու Եւրադատարանի որոշումը, եւ բողոքելու այս վճիռին դէմ:
Նախարարուհին իր կոչին մէջ կ'ըսէ թէ մարդկային իրավունքներու Եւրոպական դատարանի վճիռիը իրաւական չէ, այլ քաղաքական:
Ստորեւ` նախարար Յակոբեանի կոչը:

Յարգելի՛ հայրենակիցներ.

Մարդկային իրաւունքների Եւրոպական դատարանը դեկտեմբերի 17-ին բաւարարել է թուրք քաղաքական գործիչ Տողու Փերինչէքի հայցն ընդդէմ Զուիցերիայի, որին զուիցերիական դատարանը պատժել էր Հայոց ցեղասպանութեան փաստը ժխտելու եւ «Ցեղասպանութիւնը միջազգային սուտ է» յայտարարութիւնն անելու համար: Այս անգամ եւս կեանքը ցոյց տուեց, որ շատ յաճախ գործում են երկակի չափանիշեր, եւ տնտեսական շահերը երբեմն վեր են դասւում մարդկային իրաւունքներից, որն, ի հարկէ, անընդունելի պէտք է լինի 21-րդ դարում ապրող հասարակութիւնների համար:

Թուրք գործչի հայցը Եւրոպական դատարանում միաձայն չի ընդունուել. այն մի քանի դատաւորների որոշման արդիւնք է: Ի հարկէ, թուրքական լոպին մեծ ջանքեր է գործադրել: Եկել է այն պահը, որ մենք` հայերս, տանք աւելի ուժգին հակահարուած, որպէսզի այլ քաղաքական եւ պետական կառոյցներ չմատնանշեն Եւրոպական դատարանի այս որոշումը:

Մարդու իրաւունքների Եւրոպական դատարանի կայացրած այս որոշումը վերջնական չէ, եւ երեք ամսուայ ընթացքում Զուիցերիայի ղեկավարութիւնն իրաւունք ունի բողոքարկելու այն: Հայկական կողմը, ի դէմս սփիւռքեան մեր կառոյցների, անհատների, պէտք է լրջօրէն օգնի Զուիցերիային: Բացի այդ, պէտք է կազմակերպել բողոքի ցոյցեր եւրոպական երկրների համապատասխան մարմինների առջեւ (խորհրդարան, կառավարութիւն եւ այլն)` պահանջելով, որ այդ երկրներն իրենց հերթին ուշադրութեան կենտրոնում պահեն նշուած հարցը եւ թոյլ չտան, որ եւս մէկ անգամ ոտնահարուի հայերի արժանապատուութիւնը, խեղաթիւրուի իրականութիւնը, եւ ճանապարհ բացուի նոր ցեղասպանութիւնների համար: Մարդկային իրաւունքների Եւրոպական դատարանը կայացրել է ոչ իրաւական, այլ քաղաքական դատավճիռ:

Իւրաքանչիւր հայ պէտք է բողոքի նամակ յղի Եւրոպական դատարան, պահանջի արդարութիւն, պահանջի, որ դատարանը չվաճառի իր խիղճը. այն չի կարող ուրանալ ցեղասպանութիւնը:

Եւրոպական դատարանի այս ել. յղումն (http://appform.echr.coe.int/echrrequest/request.aspx?lang=gb) օգտագործելով` կարող էք Ձեր հաղորդագրութիւններն ու բողոքներն ուղղել դատարանին:

Այս կապակցութեամբ դիմում եմ սփիւռքեան բոլոր կառոյցներին եւ յորդորում, որպէսզի բոլորս համախմբուենք եւ միասնական ճակատով նպաստենք, որ այս վճիռը բեկանուի, եւ արդարութիւնը վերահաստատուի:

Յղէ՛ք եւ լսելի՛ դարձրէք Ձեր բողոքի ձայնը յանուն արդարութեան, յանուն Հայ դատի, յանուն մարդու իրաւունքների եւ յանուն նրա, որ աշխարհի ոչ մի անկիւնում այլեւս չկրկնուի ցեղասպանութիւն:

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՍՓԻՒՌՔԻ ՆԱԽԱՐԱՐ`
ՀՐԱՆՈՒՇ ՅԱԿՈԲԵԱՆ