ՀՅԴ Սիւնիքի մարզային կոմիտէն յայտարարութիւն մը տարածեց Սեպտեմբեր 29-ին թիւ 38 ընտրատարածքին մէջ մեծամասնական ընտրակարգով կայանալիք ընտրութիւններու վերաբերեալ:

 Յայտարարութեան գրութիւնը՝ ստորեւ.  «Հաշուի առնելով, որ - Սեպտեմբերի 29-ին, թիւ 38 ընտրատարածքում մեծամասնական ընտրակարգով կայանալիք ընտրութիւնները որեւէ էական շրջադարձ չեն նշանաւորելու, ըստ էութեան նմանուելու են նախորդ բոլոր «ընտրութիւններին», - ՀՅԴ-ն հաւատարիմ է մեծամասնական ընտրակարգի վերացման գաղափարին, - Չկան ընտրական գործընթացը ամբողջական վերահսկելու լիարժէք մեխանիզմներ, ինչը թոյլ չի տալու ընտրական արդիւնքը համարել արժանահաւատ, ՀՅԴ Սիւնիքի մարզային կոմիտէն յայտարարում է՝ 1. Ընտրութեան արդիւնքը չլեգիտիմացնելու (օրինաւոր չդարձնելու) համար մենք որեւէ կերպ չենք ներգրաւուելու ընտրական գործընթացում եւ կոչ ենք անում ընտրողներին չմասնակցել Սեպտեմբերի 29-ին կայանալիք թիւ 38 ընտրատարածքի ընտրութիւններին: 2. Առաջարկում է ոչ իշխանական միւս թեկնածուներին ինքնաբացարկ յայտարարել, զերծ մնալ իշխանութեան ծրագրած ընտրական ֆարսին մասնակցելուց եւ թուացեալ մրցակցութիւն ստեղծելուց»: