PanARMENIAN.Net - 10-րդ երեւանեան «Ոսկէ ծիրան» միջազգային կինոփառատօնը փակուեցաւ: Փառատօնի գըլխաւոր մրցանակը ստացաւ սերպ բեմադրիչ Սրջան Գոլուբովիչի «Պարունակներ» ֆիլմը. բեմադրիչը փակման արարողութեան ներկայ չէր, քանի որ արդէն մեկնած էր: Երկրորդ մրցանակը՝ «Արծաթէ ծիրանը», ստացաւ Մաջիդ Բարզեգարի «Փարվիզ»ը: Քննադատական կազմին յատուկ մրցանակը շնորհուեցաւ «Մէջտեղում ինչ-որ տեղ» ֆիլմին:
Միջազգային վաւերագրական մրցոյթի գլխաւոր մրցանակը հասաւ պուլկարացի Սվյատոսլաւ Ստոյանովի «Սեւ ծովի վերջին ծովահենները» ֆիլմի: Մրցոյթին նաեւ յատուկ մրցանակ կար, որուն արժանացաւ «Աշխարհ, որ մերը չէ» ֆիլմը: Հայկական համայնապատկերի «Ոսկէ ծիրանը» հասաւ հայ ռեժիսոր Մարիա Սահակեանի «Այդ ես չեմ» ֆիլմին: «Արծաթէ ծիրանին» արժանացաւ Լուսին Դինքի «Սարոյանլենդ»ը:
«Կորիզ» կարճամետրաժ ֆիլմերու մրցոյթին գլխաւոր մրցանակը Լեոն Պրուդովսկու «Բարի գալուստ եւ ցաւակցում ենք» ֆիլմինն էր: Քննադատական կազմին յատուկ մրցանակներու արժանացան Լուկաշ Օստալսկու «Մայրը», Էլմար Իմանովի «Դագաղագործի ճոճանակը»: Խրախուսական մրցանակներ ստացաւ նաեւ Էրիկ Շմիթի «Քառատրոփ սլացող ռնգեղջիւրը»: FIPRESCI մրցանակի արժանացաւ Սալեմ Սալավաթի «Վերջին ձմեռը», Էկումենիկ ժյուրիինը‘ Ռուսուդան Չկոնիայի «Ժպտացէք» ֆիլմը:
Դարեա Օնիշչենկոյի «Արեւելաբաղձութիւն»ը խրախուսական մրցանակ ստացաւ: Հայաստանի մէջ  Բրիտանական խորհուրդի մրցանակը ստացաւ Թամարա Ստեփանեանի «Անթեղ»ը, իսկ Ջիւան Աւետիսեանի «Ընդհատուած մանկութիւնը» ստացաւ Հրանդ Մաթէոսեանի անուան մրցանակ:
Ի դէպ, Երեւանի քաղաքապետի որոշմամբ՝ մայրաքաղաքի մշակութային կեանքին մէջ ունեցած մեծ աւանդի համար Յարութիւն Խաչատրեանը պարգե-ւատրուեցաւ Երեւանի քաղաքապետի ոսկէ մետալով:
Մրցանակները յանձնելէն ետք փառատօնի հիմնադիր-տնօրէն Յարութիւն Խաչատրեան ու ՎիվաՍելլ ՄՏՍ-ի գլխաւոր տնօրէն Ռալֆ Եիրիկեանը 10-րդ յոբելենական փառատօնը փակուած յայտարարեցին, իսկ 11-րդի աշխատանքները՝ բացուած: