Ռուսիոյ արտագաղթի ծառայութեան հայրենակիցներու վերաբնակեցման ծրագիրին, 2007էն մինչեւ 2011, դիմած են 29,500 Հայաստանի քաղաքացիներ:
2003-2010ին դիմած են 13,677, իսկ 2010-2011ի միջեւ դիմած է 15,824 քաղաքացի:
Այս ծրագիրով, Ռուսիա մեկնած է 778 ընտանիք՝ 1897 անդամով:

Հայաստանի Տարածքային կառավարման նախարարութեան Արտագաղթի պետական ծառայութեան պետ Գագիկ Եգանեան, Յուլիս 29ին յայտարարեց, թէ Ռուսիոյ արտագաղթի ծառայութեան կողմէ հայրենակիցներու վերաբնակեցման ծրագիրը անցանկալի արտագաղթի հոսք է մեզի համար, քանի որ անիկա կ՛աւարտի մշտական բնակութեան վայրի փոփոխութեամբ:
Ան ըսաւ, որ երկրին վարչապետը այդ հարցը քննարկած է ինչպէս մտաւորականներու հետ, նոյնպէս ալ լրագրողներու հետ հանդիպման ձեւաչափերու մէջ:
Եգանեանի խօսքով, այս հարցը այժմ կը քննարկուի ամենաբարձր մակարդակով. ըստ անոր, հարցը բարձրացած է հայ-ռուսական միջկառավարական յանձնաժողովին, ուր նշուած է, թէ «Հայաստանի պարագային՝ մօտեցումը պէտք է ուրիշ ըլլայ»:
Տարածքային կառավարման նախարարութեան արտագաղթի ծառայութեան պետը ընգծեց, որ ինք չըսէր, թէ արտագաղթ ընդհանրապէս չկայ. «Եթէ արտագաղթի տեղաշարժ չլինի, ապա զարգացում էլ չի կարող լինել: Անգամ ամենազարգացած պետութիւններից մարդը կարող է աշխատելու նպատակով մէկ այլ երկիր մեկնել», նշեց ան:
Յունիսին արձանագրուած է արտագաղթի դրական ցուցանիշ, որ կազմած է երկու հազար մարդ՝ նախորդ տարուան Յունիսի 3.7 հազարին դիմաց:
Այս տարուան (2011ի) Յունուար-Յունիսին, օդային փոխադրամիջոցով սահմանը հատած ուղեւորներուն տեսակարար կշիռը կազմած է 45.9 տոկոս: Նոյն ամիսներուն, ուղեւորներու արտահոսքի ընդհանուր ծաւալը, նախորդ տարուան նոյն ժամանակահատւածին համեմատ, աւելցած է 16.5 տոկոսով՝ կազմելով 1574 մարդ:
Նշենք, որ այս տարուան առաջին վեց ամիսներուն ընթացքին արտագաղթի բացասական մնացորդը՝ նախորդ տարուան նոյն ժամանակահատուածին համեմատ՝ աւելցած է 15 հազարով (28.6 տոկոսով):