Հ.Յ.Դ. Հայաստանի կազմակերպութիւնը Յուլիսի 5-8 Լոռիում գումարեց իր 17-րդ Գերագոյն ժողովը:

Քննարկելով Հ.Յ.Դ. Հայաստանի Գերագոյն Մարմնի գործունէութիւնը, անցած երկամեակում երկրում տեղի ունեցած քաղաքական ու հասարակական զարգացումները, խորհրդարանական ընտրութիւնների արդիւնքներն ու յաջորդած իրադարձութիւնները՝  Ժողովը կատարել է իրավիճակի արժեւորում եւ նախանշել  յառաջիկայ երկու տարիներին Հայ Յեղափոխական Դաշնակցութեան հայաստանեան գործունէութեան հիմնական ուղենիշները, ռազմավարութիւնն ու անելիքները:
Գերագոյն ժողովն ընթացաւ  միասնականութեան եւ համախմբուածութեան մթնոլորտում: Կուսակցութիւնը վճռական է Դաշնակցութեան աւանդոյթների, յեղափոխական, ընկերվարական, ժողովրդավարական, ազգային ծրագրային յենասիւնների վրայ  խարսխուած իր գործունէութիւնը ծաւալել երկրում ազատութեան ու արդարութեան, ազգային մեր խնդիրների լուծման համար պայքարում: Հ.Յ.Դ. հայաստանեան կազմակերպութիւնը, համահայկական կառոյցով շարունակելու է իր երթը մեր երկրի ազգային ռազմավարական խնդիրների լուծման, ծառացած մարտահրաւէրների յաղթահարման, հայութեան արդար դատի յաղթանակի համար՝  մերժելով պարտուողական կեցուածքները, պարտադրելով  վերջնականապէս հրաժարուել հայ-թուրքական   նուաստացուցիչ արձանագրութիւններից:
Գերագոյն ժողովը վերահաստատում է երկրում ամբողջական իշխանափոխութիւն իրականացնելու՝ գործող իշխանութիւնների հեռացման եւ վերջիններիս սպասարկող առկայ արատաւոր համակարգի վերացման քաղաքական ուղեգիծը: Հ.Յ. Դաշնակցութեան ընդդիմադիր գործելաոճը արտայայտուելու է բոլոր բնագաւառներում: Անաչառ քննադատութեան հետ մէկտեղ Դաշնակցութիւնը հանդէս կը գայ այլընտրանքային ծրագրեր ու լուծումներ ներկայացնող քաղաքական ուժի հանգամանքով:
Հ.Յ.Դ. Հայաստանի կազմակերպութիւնը  վճռական է պայքարը շարունակել Հայաստանի Հանրապետութիւնում պետութեան, կուսակցութեան եւ քաղաքական իշխանութեան նոյնացման, մեր երկրում արդարութեան ու արդարադատութեան հաստատման, քաղաքացուն ազատ ապրելուն, աշխատելուն եւ արարելուն խանգարող բոլոր խոչընդոտների չէզոքացման ուղղութեամբ: Պետութիւնը թուլացնող այդ երեւոյթների եւ ձախողուած տնտեսական քաղաքականութեան հետեւանքն են ահագնացող աղքատութիւնը, սոցիալական բեւեռացումը, սպառնալի ծաւալների հասնող արտագաղթը, օրաւուր աճող արտաքին պարտքը, ազատութիւնը խոչընդոտող մենաշնորհների ամրապնդումը, որոնց արդիւնքում  վերանում է ապագայի նկատմամբ հաւատն ու վստահութիւնը:
Հայ Յեղափոխական Դաշնակցութիւնը յառաջիկայ տեղական ինքնակառավարման մարմինների եւ ՀՀ նախագահական ընտրութիւններին մասնակցելու է մեր երկրում քաղաքական ընտրութեան միջոցով բոլոր մակարդակներում ժողովրդի իշխանութեան հաստատման համոզումով: Համոզուած ենք, որ ազգային նպատակների իրականացման, սոցիալական արդարութեան եւ ժողովրդավարութեան հաստատման երաշխիքը ազատ  քաղաքացին եւ արդար պետութիւնն են:
Հայ Յեղափոխական Դաշնակցութեան Հայաստանի կազմակերպութիւնը վճռական է այս գործում շարունակել իր ընթացքը եւ հետամուտ լինել ստանձնած առաքելութեանը՝  մեր երկրում հաստատել արդարութիւն եւ  ազատութիւն:

Հ.Յ.Դ. Հայաստանի Գերագոյն ժողով

8 Յուլիսի, 2012թ. Լոռի