«Մենք մտահոգուած ենք շփման գծի վրայ միջադէպերու տեւականութեամբ» կ'ըսէ ան
Հայաստանի նախագահ Սերժ Սարգսեանի հրաւէրով այսօր պաշտօնական այցելութեամբ Հայաստան ժամանեց Աւստրիոյ Հանրապետութեան նախագահ Հայնց Ֆիշերը, իր տիկնոջ՝ Մարգիթ Ֆիշերի հետ:
Այցելութեան ծիրէն ներս այսօր առաւօտուն անոնք Քասքատի մէջ շրջեցան, ապա տեղի ունեցաւ երկու նախագահներու հանդիպումը:
ՀՀ եւ Աւստրիոյ նախագահները պիտի մասնակցին նաեւ հայ-աւստրիական գործարար համաժողովի:
Նախքան Երեւան իր այցելութիւնը, Հայնց Ֆիշեր բացառիկ հարցազրոյց մը տուած էր « Հայաստանի հանրապետութիւն» օրաթերթին: Անդրադառնալով հայ-ատրպէյճանական սահմանին եւ Ղարաբաղի շփման գծին վրայ հրադադարի խախտման վերջին դէպքերուն, Ֆիշերը նշած է, որ Աւստրիան մեծապէս մտահոգուած է շփման գծի վրայ միջադէպերու տեւականութեամբ: Իսկ դիպուկահարները ետ քաշելու մասին, ինչպէս եւ սահմանային միջադէպերու հետաքննութեան մեխանիզմի մասին, ան հաստատած են թէ անոնք անհրաժեշտ են հակամարտութեան կարգաւորման մօտենալու համար: Հայնց Ֆիշերը նաեւ իր ափսոսանքը յայտնած է, որ դադրած է Հայաստանի եւ Թուրքիոյ միջեւ յարաբերութիւններու կարգաւորման վերաբերեալ արձանագրութիւններու վաւերացումը: