Կարմիր Խաչի միջազգային կոմիտէի Հայաստանեան պատուիրակութեան տուեալներով, Հայաստանէն անյայտ կորածներու թիւը կը հասնի 407-ի, Լեռնային Ղարաբաղէն՝ 449-ի:
Հայաստանի գերիներու, պատանդներու եւ անյայտ կորածներու հարցերով յանձնաժողովի աշխատանքային խումբի ղեկավարը կÿըսէ, թէ հայկական կողմը հաւաստի տեղեկութիւններ ունի այն մասին, որ անյայտ կորածներէն 90-ը կենդանի են: Անոնց վերաբերեալ վերջին տեղեկութիւնները ստացուած են 2005 թուականին:
Հայաստանի գերիներու, պատանդներու եւ անյայտ կորածներու հարցերով յանձնաժողովին մօտ յոյս կայ, որ երեք տարուայ ընդմիջումէն յետոյ Ատրպէյճանը պիտի վերսկսի համագործակցութիւնը՝ համաձայնելով մասնակցիլ հայկական կողմի հետ հանդիպման: Այժմ հայկական կողմը կը սպասէ Ատրպէյճանի իշխանութիւններու արձագանգին՝ երրորդ երկրի մը մէջ հանդիպում կազմակերպելու վերաբերեալ:
Հայաստանը Կարմիր Խաչի միջազգային կոմիտէի միջոցով վերջնական տեսքի բերած է ակնկալուող հանդիպման աշխատանքային օրակարգը ե ւ այն մայիսին պաշտօնապէս փոխանցած է Ատրպէյճանի իշխանութիւններուն: Այս մասին «Ազատութիւն» ռատիոկայանին փոխանցեց Հայաստանի գերիներու յանձնաժողովի աշխատանքային խումբի ղեկավար Արմէն Գաբրիէլեանը:
2009 թուականէն արդէն ի զօրու է Հայաստանի առաջարկը Ատրպէյճանի՝ թէ երրորդ երկրի մը մէջ պէտք է հանդիպիլ ու լուծել այս հարցը: Ատրպէյճանի յանձնաժողովը այս առաջարկին միայն երեք տարի յետոյ է որ արձագանգած է, հաւանութիւն տալով հանդիպումը կազմակերպելու մասին, թէեւ Ատըրպէյճանի նախնական համաձայնութեան վերաբերեալ որեւէ փաստաթուղթ չկայ:
Կարմիր Խաչը եւս տեղեակ է, ու իր համաձայնութիւնը տուած է թեքնիք հարցերու մասին աջակցութիւն ցուցաբերելու կապակցութեամբ: Հանդիպման նպատակն է քննարկել ոչ թէ քաղաքական, այլ մարդասիրական հարցեր: Մասնաւորապէս, Հայաստանը մտադիր է անդրադառնալու ղարաբաղեան պատերազմի հետեւանքով անյայտ կորածներու, գերեվարուած անձերու, ինչպէս նաեւ զոհուած մարտիկներու աճիւնները ետ վերադարձնելու հարցերուն:
Գաբրիէլեանը կ'աւելցնէ, թէ իրենք մարդասիրական հարցեր կը բարձրացնեն, որոնց աւելի քան երեք տարի է Ատրպէյճանի յանձնաժողովը անպատասխան թողած է:
«Այսինքն քաղաքական քարոզչութեամբ եւ ապատեղեկատուութեամբ են զբաղւում, իսկ լուրջ մարդասիրական աշխատանք բացարձակապէս չեն տանում», - կ'ըսէ ան: