Երէկ ՀՅԴ Հայաստանի Գերագոյն մարմինը հրապարակեց Կիրակի օրուան խորհրդարանական ընտրութիւններուն վերաբերող իր յայտարարութիւնը: Ստորեւ՝ յայտարարութեան ամբողջական բնագիրը:

Աւարտուեցին հերթական խորհրդարանա- կան ընտրութիւնները, որոնք նոր քաղաքական ու բարոյական փորձութիւնն էին մեր պետականութեան եւ ժողովրդի համար:
ՀՅ Դաշնակցութիւնը հանրութեանը ներկայացաւ ընտրական յստակ ծրագրով, որի կենսագործման դէպքում բոլորս կ՛ապրէինք որակապէս այլ երկրում: Մենք հրապարակային աշխուժ քարոզարշաւ անցկացրեցինք,  մեր մօտեցումները հասցրեցինք ընտրողներին, արժանացանք համընդհանուր ընկալման: Շնորհակալ ենք բոլոր նրանց, ովքեր քուէարկեցին ՀՅ Դաշնակցութեան օգտին:
Ցաւօք, ընտրութիւնները չարձանագրեցին ժողովրդի կամքը եւ քաղաքական ուժերի իրական յարաբերակցութիւնը: Պարզ դարձաւ, որ համընդհանուր ընտրախախտումները ծրագրաւորուած էին եւ տեղի ունեցան տեղամասային կենտրոններից դուրս՝ Մայիսի 6-ին եւ նախորդող օրերին: Իշխող համաձայնական կառավարութեան անդամների անուան դիմաց գրանցուեցին բարձր արդիւնքներ. նախ եւ առաջ ի հաշիւ պետական եւ վարչական լծակների ամբողջական օգտագործման ու ընտրակաշառքի վերածուած աննախադէպ մեծ նիւթական միջոցների: Անառարկելի փաստ է, որ ընտրակաշառքը վճռորոշ ազդեցութիւն ունեցաւ ընտրութիւնների արդիւնքների վրայ:
Այս իրողութիւնը վկայում է, որ ընկերային դժուար վիճակի մատնուած,  իրաւականօրէն անպաշտպան, պետութիւնից օտարուած հայ հասարակութեան բացարձակ մեծա-  մասնութիւնը չկատարեց ազատ ու գիտակցուած ընտրութիւն: Ժողովրդի ապաքաղաքականացումը, աղքատութիւնն ու թշուառութիւնը ընտրակաշառքի եւ ճնշումների մի- ջոցով ապահովեցին իշխանութիւնների վերարտադրումը:
Սա նաեւ նշանակում է, որ քաղաքական ուժերը, այդ թւում ՀՅ Դաշնակցութիւնը, դեռ չեն կարողացել մեր հասարակութեան մէջ ազատ քաղաքացու, արժանապատուօրէն ընտրութիւն կատարողի գիտակցութիւն արմատաւորել:
ՀՅ Դաշնակցութիւնը, որպէս ինքնուրոյն, յստակ սկզբունքներ դաւանող քաղաքական ուժ, ընտրական արդիւնքների առումով իր այս նահանջը սառնասըրտօրէն ձեւակերպում է որպէս գործունէութեան նոր փուլի սկիզբ՝  համընդհանուր պայքարի շարունակութիւն մինչեւ  ամբողջական իշխանափոխութիւն:
Վստահ ենք, որ վաղ թէ ուշ մեր անկախ պետութեան մէջ յաղթանակելու են ԱԶԱՏՈՒԹԻՒՆԸ, ԱՐԴԱՐՈՒԹԻՒՆԸ, ԴԱՇՆԱԿՑՈՒԹԻՒՆԸ:

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ
ԳԵՐԱԳՈՅՆ ՄԱՐՄԻՆ
8 Մայիս, 2012,  Երեւան