Սեպտեմբեր 28ին, Հ.Հ. սփիւռքի նախարարութեան «Իմ Հայաստան» համահայկական փառատօնի ծիրէն ներս, Կոմիտասի անուան կամերային երաժշտութեան տան մէջ տեղի ունեցաւ «100+1» խորագիրով համերգը, որուն մասնակցեցաւ Հ.Հ. սփիւռքի նախարար Հ
րանոյշ Յակոբեան:
Հ.Հ. սփիւռքի նախարարութեան մամուլի եւ տեղեկատուութեան վարչութեան փոխանցած տեղեկութիւններով՝ համերգը վարեց Հ.Հ. վաստակաւոր լրագրող Սարգիս Նաճարեան:
Հնչեցին Կոմիտասի, Սայաթ-Նովայի, Առնօ Բաբաջանեանի, Էդուարդ Միրզոյեանի, Մակար Եկմալեանի ստեղծագործութիւնները, զորս կատարեցին Կարինէ Հելման-Գէորգեան եւ Քրիսթեր Վիկմարք (Շուէտ), Նարէն (Լիբանան), Սօսէ Գրիգորեան (Իսրայէլ), Ատել Ազրոյեան (Ռուսաստան), Մարինա Պէրպէրեան եւ Իռենա Քոֆման (Ա.Մ.Ն.), Արամ Խորոզեան (Սուրիա), Սար Սարգսեան (Արցախ):
Ընթերցուեցան Պետրոս Դուրեանի, Վահան Թէքէյեանի, Սիամանթոյի բանաստեղծութիւնները: Լիբանանէն հայրենադարձ ասմունքող Յակոբ Գույումճեան հանդիսատեսին ներկայացուց Եղիշէ Չարենցի «Ես իմ անուշ Հայաստանի» բանաստեղծութիւնը:
Ստաֆանիա Թօփալեան (Ճափոն) եւ Վահէ Թիլպեան (Եթովպիա) կատարեցին 2015թ. Եւրոտեսիլի մէջ Հայաստանը ներկայացուցած, Հայոց Ցեղասպանութեան 100րդ տարելիցին նուիրուած «Մի ժխտիր» երգը: Ելոյթ ունեցաւ Արարատեան հայրապետական թեմի «Ծաղկազարդ» համոյթը, քանոնահարուհի՝ Հ.Հ. ժողովրդական արուեստագիտուհի Յասմիկ Լէյլոյեան, Հ.Հ. մշակոյթի վաստակաւոր գործիչ, երգահան Անահիտ Շահզատէյեան եւ այլք:
Համերգի աւարտին ողջոյնի խօսքով հանդէս եկաւ Հ.Հ. սփիւռքի նախարար Հրանոյշ Յակոբեան: