Հայաստանի նախագահ Սերժ Սարգսեանը երէկ երկօրեայ պաշտօնական այցով  Վրաստան այցելեց:

Հայաստանի նախագահի մամլոյ գրասենեակի փոխանցմամբ‘ այցի ընթացքին ան հանդիպումներ պիտի ունենայ Վրաստանի նախագահ Միխաիլ Սահակաշվիլիի, խորհրդարանի նախագահ Դաւիթ Բաքրաձէի, համայն Վրաստանի կաթողիկոս-պատրիարք Իլիա երկրորդի հետ:
Հայաստանի եւ Վրաստանի նախագահները երկկողմ եւ ընդլայնուած կազմով բանակցութիւններէն ետք հանդէս պիտի գան համատեղ մամլոյ ասուլիսով:
Կը նախատեսուի նաեւ շարք մը բնագաւառներու մէջ  երկկողմ համագործակցութեան զարգացման ուղղուած փաստաթուղթերու ստորագրում:
Թիֆլիսի մէջ Սերժ Սարգսեանը պիտի մասնակցի նաեւ հայ - վրացական գործարար համաժողովի բացման, պիտի այցելէ Սուրբ Էջմիածին եկեղեցի եւ հանդիպում պիտի ունենայ Վրաստանի հայ համայնքի ներկայացուցիչներուն հետ:

Այցելութիւն՝ Մարսիլիա

Եւրոպայի ժողովրդական կուսակցութեան (ԵԺԿ) 20րդ նիստին ներկայ գտնուելու համար, Հայաստանի Հանրապետութեան նախագահ Սերժ Սարգսեան, Դեկտեմբեր 6-8 Մարսիլիա պիտի այցելէ: