«Ազատութիւն» ձայնասփիւռի կայանի թղթակից Սարգիս Յարութիւնեանի հետ ունեցած հարցազրոյցի ընթացքին, Հ.Յ.Դ. Բիւրոյի ներկայացուցիչ Հրանդ Մարգարեան ըսած է, որ համաձայնական կառավարութեան մաս կազմելու առնչութեամբ շուրջ երկու օր առաջ բանակցութիւններ ունեցած են հանրապե տութեան նախագահ եւ իշխող կուսակցութեան ղեկավար Սերժ Սարգսեանի հետ:
«Մենք մինչեւ վերջին հանրաքուէն, երբ մեզի կ՛ըսէին, մենք կ՛երդուէինք, որ ոչ մէկ խօսակցութիւն կայ մեր եւ իշխանութեան միջեւ համաձայնական կառավարութեան հարցով: Մենք ատիկա միշտ ըսած ենք: Մինչեւ այս պահը, որ ես ձեզի հետ կը խօսիմ, նման որեւէ բան մեր մէջ տեղի չէ ունեցած եւ չ՛ունենար:
Այսօր կ՛ըսեմ, որ այսօր տեղի կ՛ունենայ, եւ ես պահելու խնդիր չունիմ: Հարցը այն է, որ, այո՛, մենք պատասխանատուութեամբ գացած ենք նոր սահմանադրութեան ընդունման: Դաշնակցութիւնը իր վրայ մեծ բեռ վերցուցած է, Դաշնակցութիւնը մեծ պատասխանատուութիւն վերցուցած է` համոզումով, հաւատքով երթալու սահմանադրական փոփոխութիւններուն: Եւ այսօր մենք չենք կրնար պատասխանատուութիւն չկրել այդ առումով, այդ սահմանադրութիւնը իրագործելու առումով, այդ սահմանադրութիւնը կեանքի վերածելու իմաստով: Այդ պատճառով մենք համաձայն ենք համագործակցութեան»,- ըսած է Հրանդ Մարգարեան:
Անոր համաձայն, առայժմ դժուար է ըսել, թէ համաձայնական կառավարութիւնը իշխանութեան հետ ի՞նչ ձեւ պիտի ստանայ, որովհետեւ տակաւին կը գտնուին բանակցութիւններու նախնական հանգրուանին մէջ: Առաջարկ ներկայացուած է, «եւ մեզի համար ատիկա սկզբունքօրէն ընդունուած է, որ պէտք է ունենանք համագործակցութիւն` սահմանադրութիւնը կեանքի վերածելու իմաստով: Բայց ուրիշ որեւէ խօսակցութիւն առայժմ տեղի չէ ունեցած»:
Հ.Յ.Դ. Բիւրոյի ներկայացուցիչը յստակ պատասխան չէ տուած այն հարցումին, թէ իշխող համաձայնական կառավարութեան մաս պիտի կազմեն 2017ի խորհրդարանական ընտրութիւններէն առա՞ջ, թէ՞ ետք: «Ես տակաւին չեմ կրնար ըսել, որովհետեւ իրականութեան մէջ իրական համաձայնական կառավարութիւնը կրնայ ըլլալ, որ կազմուի խորհրդարանական ընտրութիւններէն ետք: Որովհետեւ կուսակցութիւնները խորհրդարանին մէջ մեծամասնութիւն ունենալու համար պէտք է իրարու կարիք ունենան: Ատիկա է իրական համաձայնական կառավարութիւնը»:
Անցեալ տարիներու ընթացքին Դաշնակցութիւնը շարունակաբար կը պնդէր, որ իշխող համաձայնական կառավարութիւն կը մտնէ միայն իր առաջադրած եօթը կէտերուն կատարումէն ետք: Հրանդ Մարգարեան զրոյցի ընթացքին չյստակացուց` արդեօք այդ պահանջները կատարուա՞ծ են. չմանրամասնեց նաեւ, թէ նոր կառավարութեան մէջ Հ.Յ.Դ.ին ի՞նչ պաշտօններ պիտի տրուին:
«Ես կը կարծեմ, որ ժողովուրդը յուսահատած է քաղաքական ուժերէն, բայց ժողովուրդը նաեւ ճամբայ ցոյց կու տայ: Ժողովուրդը ցոյց կու տայ այն ճամբան, որուն մասին կը խօսինք մենք արդէն քանի մը տարիէ ի վեր. որ, այո՛, մենք ուրիշ ելք չունինք, բացի այն, որ ընտրութիւններու միջոցով պէտք է իշխանափոխութիւն տեղի ունենայ: Եւ ատիկա կարելի է, եւ կարելի է»:
Երբ թղթակիցը իր զրուցակիցին յիշեցուց, որ 1991էն ի վեր ընտրութիւններու միջոցով երբեք իշխանութիւն չէ փոխուած, իսկ ընդդիմադիրներն ալ միշտ պնդած են, որ ընտրութիւնները կեղծուած են, Մարգարեան արձագանգեց.- «Հիմա ես չեմ կրնար ըսել, որ 1991էն մինչեւ այսօր ընտրութիւնները նոյն չափով, նոյն տարողութեամբ, նոյն խորութեամբ, նոյն մեծութեամբ կը կեղծուին: Ես հաւատացած եմ, որ օրէ օր ժողովուրդին մասնակցութիւնը, աշխուժութեան չափը կը մեծնայ: Կ՛ընդունիմ, որ կը կեղծուին, բայց ես կը տեսնեմ նաեւ զարգացման հոլովոյթ»:
Սահմանադրական հանրաքուէէն ետք ընդդիմադիր ուժերը յայտարարեցին, որ անոր արդիւնքները կեղծուած են։ Դաշնակցութիւնը չբացառեց, որ կեղծիքներ եղած են` պնդելով, սակայն, որ հանրաքուէն կայացած է:
«Բոլոր ընտրութիւններուն ընթացքին կեղծիք եղած է` անշուշտ այդպէս է: Բայց կեղծել բառը շատ բացարձակ հասկացողութիւն է եւ վտանգաւոր հասկացողութիւն է: Իսկապէս, երբ մենք այս ընտրութիւններուն կ՛ըսենք, որ, այո՛, մենք կ՛ընդունինք, որ կեղծիք եղած է, բայց կեղծիքը ի՞նչ չափով եղած է… Մենք ի վիճակի չենք այդ գնահատականը տալու, ասիկա փաստ է: Դիւրին է ըսել` կեղծուած է... 90 առ հարիւրո՞վ, 95 առ հարիւրո՞վ, թէ՞ 51 առ հարիւրով, թէ՞ 48 առ հարիւրով... Ոչ ոք չափելու միաւոր ունի: Ասիկա ոչ թէ այս ընտրութիւններուն պարագային էր: Նախորդ ընտրութիւններուն պարագային էր, երբ Դաշնակցութիւնը կ՛ըսէր, որ կեղծուած եղած է, յայտարարութիւն տուած է, բայց արդիւնքները ընդունած է, որովհետեւ այլ ելք չէ եղած»: