Յուլիս 15ին հրապարակուեցաւ Հայաստանի Հանրապետութեան Սահմանադրութեան 1-7 գլուխներու նախագիծի նախնական տարբերակը` հանրային քննարկումներու համար: Նախագիծը դրուած է Հայաստանի Հանրապետութեան արդարադատութեան նախարարութեան պաշտօնական կայքին վրայ:
«Ժողովրդավարութիւն` իրաւունքի միջոցով» եւրոպական յանձնաժողովի (Վենետիկի Յանձնաժողովի) մասնագէտներուն հետ քննարկումներու արդիւնքներով՝ սահմանադրական բարեփոխումներու մասնագիտական յանձնախումբը 10, 13, 14 եւ 15 Յուլիսի հերթական նիստերուն ընթացքին մշակեց սահմանադրութեան 1-7րդ գլուխները»,- յայտնեց սահմանադրական բարեփոխումներու մասնագիտական յանձնախումբի քարտուղարութիւնը:
Սահմանադրութեան նախագիծի նախնական տարբերակի 5րդ գլուխին մէջ (Հանրապետութեան Նախագահը), մասնաւորապէս նշուած է, որ հանրապետութեան նախագահը պետութեան գլուխն է եւ կը մարմնաւորէ ազգային միասնականութիւնը:
Հանրապետութեան նախագահը կ՛ընտրուի 7 տարուան ժամկէտով, նոյն անձը հանրապետութեան նախագահ կրնայ ընտրուիլ միայն մէկ անգամ, նշուած է սահմանադրութեան նախագիծի 124րդ յօդուածին մէջ: Յօդուած 125ն ալ կը սահմանէ, որ հանրապետութեան նախագահը կ՛ընտրուի ընտրողներու ժողովի մը կողմէ: Ընտրողներու ժողովը կազմուած է Ազգային Ժողովի պատգամաւորներէ եւ Ազգային Ժողովի պատգամաւորներու թիւին հաւասար տեղական ինքնակառավարման մարմիններու կողմէ իրենց կազմէն ընտրուած ներկայացուցիչներէ:
Նախագիծի 6րդ գլուխով (Կառավարութիւնը) կը սահմանուի, որ կառավարութիւնը գործադիր իշխանութեան բարձրագոյն մարմինն է, որ իր ծրագիրին հիման վրայ կը մշակէ եւ կ՛իրականացնէ պետութեան ներքին եւ արտաքին քաղաքականութիւնը, կ՛իրականացնէ պետական կառավարման համակարգի ընդհանուր ղեկավարումը:
Պատերազմի ժամանակ զինեալ ուժերու գերագոյն ընդհանուր հրամանատարը վարչապետն է,- նշուած է սահմանադրութեան նախագիծի 154րդ յօդուածին մէջ: