Միացեալ Նահանգներու արտաքին գործոց նախարար Ճան Քերի՝ ներկայացնելով 2014 թուականի «Մարդու Իրաւունքներու Պաշտպանութեան» տարեկան զեկոյցը, յայտարարած է, որ Հայաստանի մէջ մարդու իրաւունքնե րու պաշտպանութեան իմաստով 2014 թուականի մեծագոյն խնդիրը եղած է այն, որ փտածութիւնը կանոնաւորաբար շարունակուած է ու կառավարութեան մէջ առկայ եղած է թափանցիկութեան պակասը, արձանագրուած է արդարադատութեան համակարգի սահմանափակ անկախութեան եւ իրենց կառավարութիւնը փոխելու քաղաքացիներուն ընձեռուած կարելիութեան պակասը:
Ըստ անոր՝ «Գործադիր ճիւղը Հայաստանի մէջ կը շարունակէ քաղաքական ճնշումներու տակ պահել դատարանները: 2014 թուականին նկատելի եղած է բանակին մէջ ոչ¬մարտական պայմաններու մէջ արձանագրուած կասկածելի մահերը, ինչպէս նաեւ նորակոչիկներու նկատմամբ բռնութիւններուն թիւը»։
Զեկոյցը նաեւ փաստած է, որ Հայաստանի մէջ ոստիկանութիւնը խոստովանութիւններ ստանալու նպատակով կը շարունակէ հարցաքննութեանց ընթացքին ծեծի գործածութիւնը: Իսկ իշխանութիւնը որեւէ մէկուն պատասխանատուութեան չէ ենթարկած 2008 թուականի նախագահական ընտրութիւններէն ետք՝ Մարտ 1ի խռովութեանց ընթացքին, 8 քաղաքացիներու եւ երկու ոստիկաններու սպանութեան համար:
Հակառակ անոր որ Հայաստանի օրէնքները կը ճանչնան անմեղութեան վարկածը, սակայն, ըստ զեկոյցին, իշխանութիւնները այդ օրէնքը չեն յարգեր:
Հայաստանի մէջ մեծ թիւով անձեր կրցած են քննադատել կառավարութիւնը: Սակայն, Քերիի զեկոյցին մէջ նշուած է, որ 2014 թուակնի Նոյեմբերի աւարտին ու Դեկտեմբերին տեղի ունեցած են յարձակումներ ընդդէմ քաղաքական ու քաղաքացիական գործիչներու, որոնց կարգին՝ խորհրդարանի ընդդիմադիր անդամի:
Զեկոյցը նաեւ կը յիշեցնէ Հ.Հ. նախագահին դէմ որեւէ ձեւով խօսողներուն «ականջները կտրելու» մասին փոխ¬ոստիկանապետին սպառնալիքը:
Մամլոյ ազատութեան առումով, Միացեալ Նահանգներու արտաքին գործոց նախարարութեան տարեկան զեկոյցին մէջ նշուած է, որ ի հակադրութիւն համացանցային պարբերականներուն, Հայաստանի մէջ տպագիր ու ձայնասփիւռի–պատկերասփիւռի կայանները հիմնականօրէն զրկուած են քաղաքական տարբեր կարծիքներ արտայայտելու կարելիութենէն։