Երեւանի մէջ բացումը կատարուեցաւ Ֆրիտիոֆ Նանսենի արձանին
Նանսենի անունն ու գործը մինչեւ այսօր կը յիշուին հայութեան կողմէ: Հայաստանի մէջ իր տեղը գտաւ հայ ժողովուրդի մեծ բարեկամի կիսանդրին: Նոյեմբեր 9-ին արտաքին գործոց նախարար Էդվարդ Նալբանդեանը եւ Նորվեկիոյ իր պաշտօնակից Եոնաս Գահր Ստյորն բացումը կատարեցին Աբովեան փողոցին վրայ գտնուող արձանին:
Ողջունելով հիւրի ներկայութիւնը նախարար Նալբանդեան նշեց, հայ-նորվեկիական համագործակցութեան ընդլայնման ուղիները շատ են:
Շնորհակալութիւն յայտնելով ջերմ ընդունելութեան համար՝ Եոնաս Գահր Ստյորն գոհունակութիւն յայտնեց, որ իր այցելութիւնը կը համընկնի Հայաստանի մէջ մեծ շուքով նշուող իր անուանի հայրենակից Ֆրիտիոֆ Նանսենի ծննդեան 150-ամեակի միջոցառումներուն հետ:
Իր այցելութեան ծիրէն ներս, Նորվեկիացի նախարարը հանդիպումներ ունեցաւ, քննարկելով տնտեսական, կրթական, երկու երկիրներէն ներս ազատ մուտքի փոխադարձ արտօնութեան եւ այլ բնագաւառներէ ներս համագործակցութեան հարցեր:
Տեղի ունեցաւ համաձայնագիրներու ստորագրում: