«Երկիր».- Երէկ իր աւարտին հասաւ ԵԱՀԿ խորհրդարանական վեհաժողովի 23-րդ տարեկան նստաշրջանը Պաքուի մէջ:
Վեհաժողովին հայկական պատուիրակութեան անդամ, ԱԺ ՀՅԴ խմբակցութեան քարտուղար Աղուան Վարդանեան Yerkir.am-ի հետ զրոյցին ընթացքին նշեց, թէ արդէն ընդունուեցաւ վեհաժոովի ամփոփիչ՝ Պաքուի հռչակագիրը, ուր ընդգրկուած են հայկական պատուիրակութեան բոլոր նախորդ օրերուն առաջարկուած ու ընդունուած առաջարկութիւնները:

Աղուան Վարդանեան տեղեկացուց, որ հռչակագրին մէջ մի քանի կէտեր կային՝ մարդու իրաւունքներու վերաբերեալ եւ այլն, որոնց Ատրպէյճանը դէմ էր, բայց այդ կէտերն ալ մնացին: «Մեր առաջարկութիւնները կոմիտէների արձանագրութիւններում նշուած բոլոր առաջարկութիւններն են, որովհետեւ կոմիտէներում ընդունուած արձանագրութիւնները վերջում մտնում են հռչակագրի մէջ: Իհարկէ կարող է այնտեղ ինչ-որ բան փոխուած լինէր, բայց ամէն ինչ նոյնութեամբ մնացել էր, ու այդ իմաստով ամէն ինչ նորմալ էր՝ յատուկ բան չկայ: Աւարտեցինք՝ մեր սուրը փառքով դրեցինք պատեան. սովորական ԵԱՀԿ լիակատար տարեկան նստաշրջան էր»,- նշեց Աղուան Վարդանեան:
Հայկական պատուիրակութիւնը արդէն Հայաստան վերադարձաւ:

ԵԱՀԿ Խորհրդարանական Վեհաժողովի նախագահ
ընտրուած է Իլկա Կաներվան

ԵԱՀԿ-ի խորհրդարանական վեհաժողովի (ԵԱՀԿ ԽՎ) Պաքուի մէջ տեղի ունեցած 23-րդ ամառնային նստաշրջանի վերջին օրը Վեհաժողովի նախագահ ընտրուեցաւ Ֆինլանտայի պատուիրակութեան ղեկավար Իլկա Կաներվան: Այդ մասին կը հաղորդեն ատրպէյճանական լրատուամիջոցները:
ԵԱՀԿ ԽՎ-ի նախորդ նախագահը, յիշեցնենք, Մոնթենեկրոյէն խորհրդարանական Ռանկօ Կրիվոկապիչն էր:
Իլկա Կաներվան տարիներ առաջ ղեկավարած է Ֆինլանտայի արտաքին քաղաքական գերատեսչութիւնը, եղած է ԵԱՀԿ-ի գործող նախագահ: 2008 թուականին ան հեռացաւ արտգործնախարարի պաշտօնէն սկանտալի պատճառով: