Եւրոպական Յանձնաժողովը կը նշէ, որ յետընթաց արձանագրուած է Թուրքիոյ մէջ արդարադատութեան, մարդու իրաւունքներու, խօսքի ու մամուլի ազատութեան եւ շարք մը այլ մարզերու մէջ:
Այս մասին ըսուած է Եւրոպական Միութեան անդամակցութեան համար անհրաժեշտ, Թուրքիոյ կողմէ իրականացուած հիմնական քաղաքական եւ տնտեսական բարեփոխումներուն վերաբերեալ Եւրոպական Յանձնաժողովի տարեկան գնահատման զեկուցումին մէջ, որ որդեգրուած է 9 Նոյեմբերին:
Զեկուցումի Հարաւային Կովկասին եւ Կեդրոնական Ասիոյ նուիրուած հատուածին մէջ կը նշուի, որ Թուրքիան Ապրիլ 2016ին Լեռնային Ղարաբաղի մէջ տեղի ունեցած բախումներու ընթացքին բացայայտ աջակցութիւն յայտնած է Ատրպէյճանին:
2009ին ստորագրուած` Հայաստան-Թուրքիա յարաբերութիւններու կարգաւորման վերաբերող արձանագրութիւններուն գծով կը նշուի, որ անոնք դեռ չեն վաւերացուած:
Զեկուցումը կը մատնանշէ նաեւ թրքական իշխանութիւններուն խիստ եւ կանոնաւոր արձագանգը Հայոց Ցեղասպանութեան ճանաչման հարցին:
Զեկուցումի հեղինակները անդրադարձած են նաեւ Պոլսոյ «Ակօս» շաբաթաթերթի գլխաւոր խմբագիր Հրանդ Տինքի սպանութեան քրէական գործին, Պոլսոյ հայոց պատրիարքութեան կողմէ հայոց լեզուի դասաւանդման կազմակերպման խոչընդոտներուն, ինչպէս նաեւ՝ Կարսի մէջ հայերու դէմ ատելութեան քարոզչութեան առնչութեամբ «Գորշ գայլեր» կազմակերպութեան գործունէութեան:
Զեկուցումի հրապարակումէն ետք թրքական իշխանութիւնները բարձրագոյն մակարդակով խիստ քննադատութեան ենթարկած են զայն: Թուրքիոյ Եւրոպական Միութեան հարցերով նախարար Էօմեր Չելիք նոյնիսկ զայն անուանած է ապակառուցողական եւ աչառու: