Այսօր առաւօտեան ժամը 10։30ին Յունաստանի Հանրապետութեան նախագահ Գարոլոս Փափուլիասի կողմէ ընդունուեցաւ Ատրպէյճանի նախագահ իլհամ Ալիեւ, որ երկօրեայ պաշտօնական այցելութեամբ Աթէնք կը գտնուի։

Ան հանդիպումներ պիտի ունենայ նաեւ վարչապետ Անտոնիս Սամարասի եւ խորհրդարանի նախագահ Վանկելիս Մէյմարաքիսի հետ։ Այլ հանդիպումներու շարք մըն ալ պիտի իրագործուի երկրի քաղաքական ղեկավարութեան եւ ընդդիմութեան հետ։ 

Նախագահ Ալիեւ Աթէնք ժամանեց իր տիկնոջ՝ Մեհրիպան Ալիեւայի եւ 9 հոգիէ բաղկացած պատուիրակութեամբ։ Հելլէն մամուլը նախորդ օրերուն անդրադարձաւ իր այցելութեան, ըստ սովորութեան, երկարապատում յօդուածներ հրատարակելով, ուր կը շեշտուէր հելլէն գործարարական շրջանակներու հետաքրքրութիւնը Ատրպէյճանի հետ ստորագրուած համաձայնագրերու գործնականացման մասին։ Ինչպէս ծանօթ է, նախորդ տարուայ Մայիսէն ի վեր ստորագրուած է յունական կազի ՏԵՍՖԱ ընկերութեան վաճառքը ազերիական ՍՈՔԱՐ ընկերութեան, այսուհանդերձ լման այս ժամանակաշրջանի ընթացքին ո- րեւէ գործնական քայլ չէ կատար- ւած այդ ուղղութեամբ։ Իսկ եթէ տարի մը առաջ, հելլէն կառավարութեան համար գլխացաւ դարձաւ քուլիսային ճնշումներու բաժինը, թէ՛ Պրիւքսելի թէ՛ Ուաշինկթընի կողմէ, որպէսզի ՏԵՓԱն չի յանձնուի ռուսական ձեռքերու, ներկայիս, նոյն ձեւի ճնշումներ բնաւ չենք տեսներ՝ ծրագիրը յառաջացնելու եւ գործնականացման փուլ հասցնելու համար...։ Պրիւքսել նոյնիսկ անհանգիստ է, տեսնելով թէ Ատրպէյճան յարձակողական քաղաքականութիւն պիտի վարէ՝ եւրոպական շուկան եւ ուժանիւթի տարածման ցանցին մէջ ուժական ներկայութիւն պահանջելով ու պարտադրելով։
Քաղաքականութեան այս խաղերուն մէջ, Ատրպէյճան կը փորձէ հանգստացնել եւ սիրաշահիլ Յունաստանի պետութիւնը (նաեւ երկրի ժողովուրդը) թէ՝ յունական think-tank-երու պէտք ունի, թէ Յունաստանի արհեստագիտական օգնութեան կարիքը կայ, յատկապէս ուժանիւթի այլընտրանքային միջոցներու օգտագործման մէջ, գիտակցելով թէ նաֆթն ու կազը անվերջանալի չեն։ Ազերիները յոյն պաշտօնակատարներու երեսին կը նետեն Ատրպէյճանի հարըստութիւնը, համագործակցութիւնը պայմանաւորելով Յունաստանի պետական զօրակցութեամբ՝ իրենց հետաքրքրող հարցերուն հանդէպ։ Եւ գիտենք շատ լաւ թէ որո՛նք են իրենց հետաքրքրող հարցերը։
Այսօր, նախագահ Ալիեւի հետ իրենց տեսակցութիւններուն ընթացքին, յոյն բարձրագոյն ղեկավարութեան ներկայացուցիչները, պարտին մատնանշել, - մենատիրութեամբ իր երկիրը ղեկավարող այս նախագահին-, թէ ժողովրդավարական երկիրները ազատ ընկերութիւններու մէջ ապրող քաղաքացիներու կը պատկանին, ինչպէս եւ միջազգային ընտանիքին մաս կազմող երկիրները պարտաւոր են հաշուի առնելու համաշխարհային օրէնքները, բարոյական գետնի վրայ։
Եւրոպայի յանձնաժողովի նախագահ Ժոզէ Մանուէլ Պարոզօ անցեալ շաբաթավերջին Պաքու գտնուեցաւ, Եւրոպական Միութիւն - Ատրպէյճան կապերու ծիրէն ներս։ Այս այցելութեան անդրադարձած է Եւրոպայի Հայ Դատի Յանձնախումբը, նախագահ Պարոզոյին ղրկուած նամակով մը, մատնանշելով Ատրպէյճանի մէջ կաշառակեր ու բռնատիրական վարչակարգի թերութիւնները։

Հ.

Բաց նամակ Եւրոպական Միութեան նախագահ Ժոսէ Մանուէլ Պարոսոյին

Պրիւքսել, 12 յունիս, 2014

Յարգելի պարոն նախագահ,

Յունիս 14-ին շուտով պիտի այցելէք Ատրպէյճան, ուր երկկողմանի բանակցութեանց համար պիտի հանդիպիք նախագահ Իլհամ Ալիեւին, եւ դիւանագիտական ակադեմիայի մէջ դասախօսութիւն մը պիտի տաք «Եւրոմիութիւն - Ատրպէյճան՝ նոր առիթներ եւ մարտահրաւէրներ» նիւթով:
Եւրոպայի Հայ Դատի յանձնախումբը անգամ մը եւս ձեր ուշադրութեան կը յանձնէ Ատրպէյճանը որ, «Ֆրիտոմ հաուս» կազմակերպութեան համաձայն «ոչ-ազատ» երկիր մըն է, որուն նախագահ Իլհամ Ալիեւը Կազմակերպուած ոճրագործութեան եւ փտածութեան զեկոյցի ծրագրի առաջին «տարուան անձ» կոչումը ստացաւ (https://reportingproject.net/occrp/index.php/en/ccwatch/cc-watch-indepth/1772-occrp-names-aliyev-qperson-of-the-year-q-), որ 2003-ին յաջորդեց իր հօր, եւ աւելի բրտութեամբ շարունակեց անոր իշխանութեան օրոք սկսած ամենադաժան ճնշումները: Այն օրերէն արդէն, քարիւղի եկամուտներէն ստացուած հսկայական գումարները յառաջացուցած են նախագահական հովանաւորութիւնը, ամրապնդած են պետութեան ապահովական մեքենան, եւ իշխանութեան հանդէպ եղած ներքին եւ արտաքին քննադատութիւնը մասամբ խեղդած են (http://freedom-house.org/report/nations-transit/2014/azerbaijan):
Երէկ, «Ֆորէյն փոլիսի» պարբերաթերթը «Կասպից ծովի Քորլէօները. ինչպէս Ատրպէյճանի մենատէրը կը կաշառէ Միացեալ նահանգներն եւ Եւրոպան» (http://www.foreignpolicy.com/articles/2014/06/10/the_corleones_of_the_caspian_azerbaijan_lobbying_baku_aliyev) վերնագրով քննչական յօդուած մը հրապարակեց, շեշտելով, որ մինչ ներազգային վէճը երկրին մէջ սահմանափակուած է վախի, գրաքըննութեան եւ դատական զեղծարարութիւններու մէջ, Ատրպէյճանի մեծագոյն առաքելութիւնն է դուրսը իր պատկերը լաւ ներկայացնելն է. ուր որ չէ դիմած ամբողջովին վճարուած արձակուրդներու - իրավիճակ մը, որ «Եուրոփիըն սթապիլիթի ինիշըթիւ»ը իր զեկոյցին մէջ կոչած է «քաւիարի դիւանագիտութիւն», «Քաւիարի դիւանագիտութիւն. ինչպէս Ատրպէյճանը լռեցուց Եւրոպայի խորհուրդը» (http://www.esiweb.org/pdf/esi_document_id_131.pdf), որ երեւակայութեան շատ բան չձգեր: Միլիոններ ծախսած է Ամերիկայի եւ Եւրոպայի մէջ լոպիստական կազմակերպութիւններու եւ կազմակերպութիւններու մօտ, որ իր պատկերը բարելաւէ Ամերիկայի եւ Եւրոպայի մամուլին մէջ: Ալիեւի վարչակազմը յաջողած է բարեկամներ գնել եւ մարդոց ազդել, որոնց մէջ են նախկին եւ ներկայ ԱՄՆ քոնկրեսականներ, Բրիտանիոյ խորհրդարանականներ եւ Եւրոպայի խորհուրդի խորհրդարանական վեհաժողովի անդամներ, որոնք ժամանակին մենատիրութիւնները կը ճնշէին, այլ ո՛չ թէ կ'ողջագուրէին»:
Ամիսէ մը պակաս է, որ Եւրոպայի խորհուրդի խորհրդարանական վեհաժողովի բիւրոն որոշեց, թէ Յունիս 1, 2014 -էն սկսեալ երկու տարուան տեւողութեամբ՝ խորհուրդի յանձնախումբերու ժողովները տեղի պիտի չունենան Ատրպէյճանի մէջ (http://www.assembly.coe.int/nw/xml/News/News-View-EN.asp?newsid= 5036&lang=2&cat=13):
Ձեզ կը դիմենք, որ այս հարցերը բարձրացնէք ձեր հանդիպումներուն ընթացքին ու նաեւ նշէք հակահայ քարոզչութիւնը, որ ներկայիս տեղի կ'ունենայ Ատրպէյճանի մէջ, որ իր գագաթին հասաւ Սեպտեմբեր 2012-ին, երբ Իլհամ Ալիեւ ներեց Րամիլ Սաֆարովին՝ Հունգարիայէն Պաքու անոր ժամանումով: Սաֆարով Հունգարիոյ մէջ դատապարտուած էր հայ սպայի սպաննութեան համար՝ Պուտափեշթի մէջ տեղի ունեցած Նաթոյի «խաղաղութեան գործընկերութեան ծրագիր»ի ծիրէն ներս. Սաֆարով յանցանքն ընդունած էր, եւ չէր մեղանչած ըրածին համար, պարզապէս, որովհետեւ իր զոհն հայ էր (http://www.europarl.europa.eu/sides/getDoc.do?type=MOTION&reference=P7-RC-2012-0428&language=EN):

Եւրոպայի Հայ Դատի յանձնախումբը նաեւ կը դիմէ ձեզ որ շեշտէք, որ Ատրպէյճան յարգէ ԵԱՀԿ Մինսքի խմբակի Լեռնային Ղարաբաղի խաղաղութեան ուղղուած ջանքերը, արձակազէնները հեռացնէ շփման գիծէն, եւ ընդունի պատահարներու քննչական կառուցուածքի մը կազմութիւնը, որուն Հայաստանն արդէն իր հաւանութիւնը տուած է:
Դիւանագիտական ակադեմիայի մէջ ունենալիք ձեր դասախօսութեան ընթացքին պէտք է վերոնշեալները շեշտէք երիտասարդութեան եւ ուսանողութեան. նշէք, որ երկիր մը զարգացնելու եւ ժողովրդավարականացնելու համար ճնշող վարչակարգէ մը անդին պէտք է անցնիլ, եւ որ շրջանին մէջ տեւական խաղաղութեան համար պէտք են վստահութիւն ներշնչող քայլեր, հասկացողութիւն, հանդուրժողականութիւն եւ դիմացինը ընդունելու պատրաստակամութիւն:
Ատրպէյճանական 2% կազը, որ Եւրոպա կը հոսի՝ պէտք չէ կուրցնէ Եւրոպական միութեան յանձնաժողովը, պէտք չէ մեղսակից դարձնէ Եւրոպական միութեան արժէքներուն եւ իրաւունքներուն ոտնակոխումին, այն յոյսին ներքոյ, որ Պաքուի եւ Ալիեւի վարչակարգին հետ ստորագրուին արդիականացման ռազմավարական գործընկերութիւնը եւ ընկերութեան համաձայնագիրը, որոնց զոհերն են Ատրպէյճանի ժողովուրդը եւ տարածաշրջանը:

Յարգանքներով,
Գասպար Կարապետեան,
Նախագահ
ՀՅԴ Եւրոպայի Հայ Դատի Յանձնախումբի