Ստորեւ կը հրատարակենք Աւօ Գաթրճեանի գրչին պատկանող երգեր՝

նուիրուած 1918 Մայիս 28ի Մայիսեան հերոսամարտին,

որ տեղ գտած են «Ձօն անկախութեան» խտասալիկին մէջ:

 

ԱՐԱՄ ՄԱՆՈՒԿԵԱՆ

 

Խօսք՝ Աւօ Գաթրճեանի

Երաժշտ.՝ Րաֆֆի Ապէճեանի

 

Պայքարի հնոցի մէջ թրծուած,

Նախնիներու արիւնով շաղախուած,

Պայծառամիտ շանթերով իմաստուն,

Համակեցիր բովանդակ հայութիւն:

 

Կրկներգ.-

Հայաստանի անկախութեան կերտիչ,

Լեռնաշխարհի ծնունդ՝ հրաշք կտիճ,

Ազատասէր արծիւ դաշնակցական,

Շունչ եւ ուժ սփռող՝ Արամ Մանուկեան:

 

Նպատակդ դարձաւ սուրբ նպատակ,

Կռանիթեայ կամքով կուռ ու կրակ,

Ճառագայթի փայլքերով շողշողուն,

Մեր պատմութեան նոր էջ բացիր փայլուն:

 

Կրկ.- Հայաստանի անկախութեան կերտիչ...

 

Հայրենիքի փրկութեան ռահվիրայ,

Ազատութեան շարժման վեհ հսկայ,

Վերջ տուիր վիճակին ստրկական,

Հաւատալով Մահ կամ Ազատութեան:

 

ՄԱՅԻՍ 28

 

Խօսք՝ Աւօ Գաթրճեանի

Երաժշտ.՝ Րաֆֆի Ապէճեանի

 

Հնչեց շեփորը մեծ ահազանգին,

Պատրաստ են զաւակները մեծ ազգին,

Յանուն Սուրբ հայրենիքի փրկութեան,

Կամաւոր զինուորներ մկրտուեցան:

 

Կրկներգ.-

Փառք քեզ, անկախութեան ճակատամարտ,

Ղարաքիլիսէ եւ Սարդարապատ

Ու դուն անյաղթելի Բաշ-Ապարան,

Պոռթկումն էիք բովանդակ հայութեան:

 

Հայկի կորիւններ կրակ աչքերով,

Հզօր հաւատքի անվերջ պայքարով,

Արարատեան դաշտ կ՛իջնեն կռուելու,

Հայու պատիւը բարձր պահելու:

 

Կրկներգ.-

Փառք քեզ, անկախութեան ճակատամարտ...

 

Ռազմի դաշտն էին անխախտ կորովով,

Առաջ սլացին անվեհեր կամքով,

Թշնամու դէմ կանգնեցան անխորտակ,

Պարզելով ազատութեան դրօշակ:

 

ԶՕՐԱՎԱՐ

ԹՈՎՄԱՍ ՆԱԶԱՐԲԷԿԵԱՆ

 

Խօսք՝ Աւօ Գաթրճեանի

Երաժշտ.՝ Րաֆֆի Ապէճեանի

 

Տանջուող ցեղիդ ձայնին ականջ տուիր,

Օրհասական ժամուն հասար երկիր,

Գերագոյն պոռթկումը ժողովուրդի,

Վերածեցիր ռազմական վերելքի:

 

Կրկներգ.-

Սպարապետ, Սպարապետ Թովմաս Նազարբէկեան,

«Երկաթէ Փաշա», պարծանք, պարծանք հայութեան:

 

Զինուորական տաղանդով ահարկու,

Առաջնորդեցիր զինուորներ հուժկու,

Հայոց բանակի հմուտ Զօրավար,

Վճռականօրէն մարտի դաշտ իջար:

 

Կրկներգ.- Սպարապետ, Սպարապետ...

 

Մրրկաշունչ խոյանքով սլացար,

Խորտակելով թշնամին անհամար,

Հայաստանի անկախութեան դարբին,

Երազելի յարութեան դուն ոգին: