Հայոց Ցեղասպանութեան 100-րդ տարելիցը պիտի արթնցնէ Եւրոպայի խիղճը, ըսած է իտալացի յայտնի լրագրող, բազմաթիւ գիրքերու եւ վէպերու հեղինակ Ճիովաննի Փերելլի՝ «Sputnik-Արմէնիա» ռատիոյի եթերով:
«Սկսայ զբաղիլ Հայոց Ցեղասպանութեան հարցերով, որովհետեւ 100-րդ տարելիցն է, եւ Եւրոպական լրատուամիջոցները սկսած են հետաքրքրուիլ ցեղասպանութեամբ: Ես եկայ Երեւան, որ հասկնամ, թէ ինչու ողջ աշխարհը, բացի քսան–երեսուն երկիրներէ, չի ճանչնար Ցեղասպանութիւնը»,– ըսած է Փերելլի:
Ըստ անոր, շուտով միջազգային հանրութիւնը պիտի սկսի աւելի մեծ ճնշում գործադրել Թուրքիոյ վրայ:
Ան ընդգծած է, որ Եւրոպան այսօր ունի երկու աւելի կարեւոր խնդիր: «Օրինակ, «իսլամական պետութիւնը», որ Եւրոպայի համար առաջնահերթ խնդիր է: Հայոց Ցեղասպանութիւնը 100 տարի առաջ էր, եւ այդ ենթահողէն ներս անիկա կը դառնայ երկրորդական հարց»,– աւելցուցած է ան:
Լրագրողը կը կարծէ, որ այսօր Թուրքիոյ 70–միլիոնանոց բնակչութեան կէսը համաձայն է Հայոց Ցեղասպանութիւնը ճանչնալ, եւ եթէ վաղը Անգարան աւելի ժողովրդավարական կառավարութիւն ունենայ, հնարաւոր են որոշ յառաջխաղացումներ այդ հարցով:
Այսպէս թէ այնպէս, ըստ անոր, Թուրքիան չի կրնար ժխտել Հայոց Ցեղասպանութիւնը, քանի որ կան շարժանկարներ, վկայութիւններ, ապացոյցներ:
«Ես եղած եմ Հայոց Ցեղասպանութեան թանգարան–հիմնարկ, դիտած եմ շարժանկարներ, եւ ատիկա սարսափելի էր: Նման էր անոր, որ այսօր կ՝ընէ «իսլամական պետութիւնը»: Այսօր կ՝ըսեն, որ անկախ այդ ապացոյցներէն, հարցը պէտք է ձգել պատմաբաններուն: Հնարաւոր է, որ 200 տարի անց յայտնեն, որ այդ հարցը պէտք է ձգել հնագէտներուն»,– աւելցուցած է ան:
Համեմատելով Հայոց Ցեղասպանութեան միջազգային ճանաչման եւ Հոլոքոսթի մակարդակը` լրագրողը նշած է, որ տարբերութիւնը հզօր հրէական լոպպին է, հրեաներու մեծ դերը արեւմտեան իրականութեան մէջ:
«Հայկական լոպին զօրաւոր է, բայց ոչ այնքան, որքան հրէականը: Առաջին, Իսրայէլը Մերձաւոր Արեւելքի հզօր պետութիւններէն է: Երկրորդ, եւրոպացիները հրեաներու նկատմամբ մեղքի բարդոյթ ունին, այդ իսկ պատճառով եւրոպական կառոյցները, դատական ատեանները միշտ կը սատարեն Իսրայէլը, նոյնիսկ եթէ անիկա սխալ է: Կը կարծեմ` ելեւմտական լծակները նոյնպէս շատ կարեւոր են: Օրինակ, ԱՄՆ–ի բոլոր նախագահները կ՝ընտրուին հրեաներու նիւթական օժանդակութեամբ, այդ իսկ պատճառով ԱՄՆ-ը չի կրնար հաշուի չառնել Իսրայէլի հասարակական կարծիքը: Հայկական լոպպին ուժեղ է, բայց մտաւոր եւ մշակութային ներուժը այնքան ալ կարեւոր չէ, որքան քաղաքականը»,– ընդգծած է ան:
50 տարուան լրագրողական գործունէութեան ընթացքին Փերելլին եղած է աւելի քան 150 երկիր, հարցազրոյց ունեցած է Նելսըն Մանտելլայի, Պաշշար ալ Ասատի, Եասէր Արաֆաթի, Ուկօ Չաւէսի եւ շատ այլ առաջնորդներու հետ: Հայաստան ժամանած է առաջին անգամ:
Հայոց Ցեղասպանութիւնը 20-րդ դարու առաջին ցեղասպանութիւնն է: Թուրքիան աւանդաբար կը մերժէ Առաջին համաշխարհային պատերազմի տարիներուն շուրջ մէկուկէս միլիոն հայերու զանգուածային ջարդեր իրականացնելու մեղադրանքները եւ չափազանց ցաւագին կը վերաբերի Արեւմուտքի քննադատութիւններուն: