«Ամէն մարդ գիտէ այն հսկայ գումարները, զորս Ալիեւ տոհմը դիզած է Ատրպէյճանի նախագահութեան գալէն՝ 1993էն ի վեր» կը գրէ CCAF իր հաղորդագրութեան մէջ
Ատրպէյճանի Խորհրդարանը քուէարկութեամբ մը՝ որդեգրած է նախագահ Ալիեւի եւ իր կնոջ ցկեանս անձեռնմխելիութիւնը:
Ֆրանսահայ Կազմակերպութիւնները Համակարգող Խորհուրդը (CCAF) այս առթիւ հաղորդագրութիւն մը տարածած է՝ պարսաւելով ատրպէյճանցի բռնակալի գործելակերպը եւ միջազգային հանրութենէն, յատկապէս Ֆրանսայէն, պահանջելով դատապարտել Ատրպէյճանը եւ որոշ հեռաւորութիւն պահել Ալիեւի բռնակալական իշխանութեան հետ: «Այսպէսով, իր ամբողջ կեանքի ընթացքին անկարելի պիտի ըլլայ զայն հետապնդել իր գործած քրէական արարքներուն համար: Ամէն մարդ գիտէ այն հսկայ գումարները, զորս Ալիեւ տոհմը դիզած է Ատրպէյճանի նախագահութեան գալէն՝ 1993էն ի վեր: Բոլորն ալ գիտեն -կառավարութիւններ, ոչ-կառավարական կազմակերպութիւններ, զանգուածային լրատու գործակալութիւններ, հանրային կարծիք եւ կուսակցութիւն, թէ Ալիեւ տոհմը հարստացաւ՝ չարաշահելով իշխանութիւնը եւ խաբելով իր սեփական ժողովուրդը: Իւրաքանչիւր անհատ -ընդդիմադիր, պարզ քաղաքացի, անկախ լրագրող-, որ մատնացոյց կ'ընէ Պաքուի մէջ կատարուող կաշառակերութիւնները, նշաւակ կը դառնայ իշխանութեանց հալածանքին», կ'ըսէ CCAF:
Ապա կը նշէ, թէ ատրպէյճանական խորհրդարանին լայն մեծամասնութեամբ առած այս որոշումը քուէարկուած է ԱՄՆ-ու Արտաքին գործոց նախարարուհի Հիլըրի Գլինթընի եւ Եւրոպայի Ապահովութեան եւ Համագործակցութեան Կազմակերպութեան (ԵԱՀԿ-OSCE) գործող նախագահ Եամոն Կիլմորի՝ տարածաշրջան կատարած այցելութենէն անմիջապէս ետք: «Այս վարուելակերպը ժողովրդավարութեան արհամարհում եւ արեւմտեան դիւանագէտներու նկատմամբ նախատինք մը կը հանդիսանայ», կ'ըսուի: CCAF հարց կու տայ, թէ երբ ամերիկացիները եւ եւրոպացիները այնքան կը խանդավառուէին 2011ին՝ Մերձաւոր-Արեւելքի բռնակալներուն անկումով, այսօր ինչո՞ւ կը լռեն ատրպէյճական բռնատիրութեան առջեւ, արդեօք «կազն ու քարի՞ւղն են պատճառը»:Հաղորդագրութիւնը կ'եզրափակուի սապէս. «Ալիեւի ցկեանս անձեռնմխելիութիւնը կը թելադրէ Արցախի հայերու ազատութեան իրաւունքը պաշտպանելու հրատապ անհրաժեշտութիւնը: Մինչեւ ե՞րբ միջազգային հանրութիւնը պիտի շարունակէ յամառիլ՝ չճանչնալ Արցախի հայերուն՝ Ալիեւի բռնատիրութեան ներքեւ ապրիլը մերժելու իրաւունքը: Ատրպէյճանի կողմէ այսքա՛ն չարչարուած ժողովուրդ մը կարելի՞ է զրկել ապրելու իրաւունքէն, խաղաղութեան իրաւունքէն, արժանապատւութեան իրաւունքէն, ի՛ր հողին իրաւունքէն: Միակ լուծումը՝ Լեռնային Ղարաբաղի Հանրապետութեան անկախութեան ճանաչումն է»: